龍眼好食,殼烏烏;荔枝好食,皮粗粗        

同  舟

    有一擺佮阿母做伙去市場買菜,看著路邊賣果子的攤販咧喝賣;有一个媽媽tshua7in囝行倚彼个擔仔欲揀果子,做媽媽的本底想欲買荔枝,結果彼个查埔囡仔一看著,連鞭伸手搝媽媽,閣佇邊仔喝講:「媽媽,我無愛食荔枝啦,in生做足恐怖,一定足歹食的!我欲食蘋果。」

    看著彼一幕,我感覺真趣味,突然間就想起細漢的代誌。

1

    細漢時蹛庄跤的大瓦厝,佇厝的後面有一塊空地,阿公種一欉龍眼樹,佇我有記持,彼欉龍眼樹就已經生甲足懸,有大樹蔭通遮日。逐擺拄著樹子夠分的時令,樹頂就會掛一捾一捾的龍眼。猶會記得彼當陣定定看著阿爸踏邊仔的矮牆到樹頂,用鍥仔共一大捾的龍眼削落來,阮一群囡仔定定塑膠袋仔提咧就徛踮樹跤等,序大人驚阮予龍眼搩到,大聲喝,叫阮閃較邊仔--ê,毋過阮猶原雙跤若定根毋願離開。

    龍眼挽了,紲落去阮全家伙會坐踮埕斗食龍眼。阿媽攏會特別共較烏的龍眼揀起來予我食,彼陣我捌想過,龍眼殼烏烏,看起來真暗淡,毋過剝殼了後的果子肉顛倒是有微微仔透光的白色,食起來甜粅粅,和伊的外表予人的印象攏無相相同,真有一種衝突的美感。閣有一種佮龍眼有淡薄仔相相同的果子,就是荔枝,伊較大粒,外皮頂面粗皮皮,會刺手,猶毋過若共剝開,內底的果子肉煞使人著驚,毋但白閣滑溜,清甜閣會出汁,若是冰了才食,敢若咧食冰,予人透心涼。

    較捌代誌了後,我才知影有一句俗語講:「龍眼好食,殼烏烏;荔枝好食,皮粗粗」,確實有影。有一種柳丁烏烏醜醜,卻是誠甜。老師叫咱毋通以貌取人,其實水果嘛是袂使以貌來取。龍眼和荔枝這兩種果子雖然對外表看起來真毋成物,無親像蘋果、水蜜桃遐爾體面,毋過剝殼了後伊一點都袂輸in,人嘛是仝款,有的人第一擺看起來無咱的緣,後來煞變成咱誠欣賞的朋友;有的人看起來誠正派,後來煞做足濟歹代誌,閣舞甲上社會新聞。佮意美麗的物件是人的本性,毋過若干焦對外表去看人,咱可能會因為按呢來錯過誠濟本質真好的人,嘛可能無細膩共歹人當做好人。

    「有人攑燈看路,無人攑燈看肚」,人心隔肚皮,人的個性無法度干焦對外表就看出出,著愛謹慎觀察。仝款的道理,雖然有一寡仔人生做較無看頭,但是只要咱願意認真去接觸佮了解,無的確嘛會當發現對方是很值得深交的人;就親像龍眼佮荔枝,毋去共殼剝開,按怎會當體會的甘甜咧!

海翁台語文學月刊第107期

意見反應信箱:service@king-an.com.tw
Copyright © 2012 真平企業有限公司 版權所有.禁止擅自轉貼