第十二屆海翁文學營報導

顏之群

1 

  燒熱的暑假,又閣是一年一擺海翁台灣文學營佮逐家鬥陣的時間。今年(2016年)台灣文學館這棟建築拄好一百歲,開營這工,台灣文學館陳益源館長嘛撥工來參加開幕,陳館長用公視〈飛越文學地景〉第一百集來紹介台灣文學館,除了予逐家閣較了解台灣文學館的意義,館長嘛代表台灣文學館歡迎全國台語文的有志,來參加這擺第十二屆的海翁文學營。

王榮裕:起造現代台語戲劇

  簡單的開幕了後,第一節課就交予金枝演社的王榮裕導演來起鼓,佇開始上課進前,導演先請逐家鬥陣來注意成立台語電視台的議題,按呢各領域的台語專業人才,才會當有閣較濟發揮的空間。欲講起「金枝演社」,愛對導演對戲劇的思考來講起。開始思考家己欲做啥物款的戲劇了後,導演慢慢仔對台灣的歷史有閣較深的認捌,才發現著過去所受的教育,是按怎來壓制這片土地的文化。意識著這點了後,導演就決定欲透過戲劇來走揣台灣人對家己的認同,將文化的根釘予在。

   1

↑陳益源館長                                            ↑王榮裕導演

暗會

  暗會活動,王藝明老師代先帶來伊這幾年來的布袋戲創作,有改編經典的「西遊記系列」,嘛有佮教學結合的「台灣民間故事系列」、「俗語布袋戲系列」,予咱的囡仔會當那看布袋戲那學習台語。另外,閣有和台語作家陳建成、金曲歌王謝銘祐合作的「台灣英雄傳系列」,表現出這馬台語戲劇的創作活力。紲落來,歌手王明哲老師用伊溫柔的聲音𤆬領逐家進入伊的音樂世界,頭一首〈美麗的Formosa〉,配合著口白,唱出對土地的愛。一點鐘的表演內底,王明哲老師帶來八首歌曲,閣共每一條歌背後的故事,攏一句一句講予逐家知,毋但仝齊享受音樂,嘛鬥陣來體會人生。

1

↑王明哲老師 

杜正勝:台灣主體教育之路─台語的標音和書寫

  第二工,邀請著杜正勝教授對政策面來回顧台語教育的發展過程。杜教授對伊猶未進入教育部,閣佇中央研究院的時陣講起,彼陣,伊就注意著台灣雖罔是一个多語言的國家,毋過社會上對『國語』以外的語言,卻是充滿偏見,甚至講遮的語言的人,家己會感覺見笑。這嘛予伊開始思考欲按怎建立台灣的主體性,予逐家會當認同家己的文化。

1

↑蔡金安老師、蔣為文老師、杜正勝老師

周清玉:予囡仔講母語的環境─阮的彰化經驗

  台語的教育需要政策的推捒,嘛著愛地方的支持。關懷文教基金會,二十幾冬來攏佇彰化地區咧推廣台語,到今已經有誠讚的成績。關懷基金會除了上出名的台語演講比賽,逐冬已經吸引千外人來參加以外,閣有誠濟精采的活動:世界母語日展演、母語親子健行、趣味台語文化營、親子台語廣播營等等,攏是適合規家大細鬥陣來參加的活動。關懷就是希望透過遮的活動,共台語帶入去日常生活當中。

*想欲了解關懷文教基金會

李南衡:台灣外來語的文化現象

  佇台灣的歷史上,有真濟無仝的族群、無仝的統治者來到這片土地。佇頭前的課程當中,嘛加減有講著台語內底的外來語。第二工下晡的課,就請李南衡老師,來紹介台灣的外來語。李老師毋但將外來語分類,閣共in的「原產地」標示出來,嘛共遮的外來語提來和其他的國家,親像:中國、日本、新加坡的講法來做比較。經過李老師的分析,就會當看著遮語言背後的的文化現象。就親像一開始上課的時李老師所講的,遮的語言,因為已經佇咱遮發展出家己的特色,你這馬欲還予人,人閣毋捌彼是啥咧。

     

↑李南衡老師、周清玉老師                    ↑簡上仁老師

簡上仁:唱咱家己的囡仔歌唱劇──〈鯽仔魚欲娶某〉

  佇咧教台語的時,真濟老師嘛常在用歌謠來教囡仔,到底歌謠有啥物款的魅力(bī-li̍k)咧?咱就請台灣歌謠的專家簡上仁老師來講予咱聽。簡老師舊年佇伊的故鄉嘉義,推出伊創作的囡仔歌唱劇《鲫仔魚欲娶某》,吸引誠濟人入場觀賞。這部囡仔歌唱劇佮嘉義在地的雯翔舞蹈團、協志工商合作,由梅北國小「小烘爐劇團」的小朋友用台語來演出本土的故事。簡老師嘛希望透過創作本土的囡仔歌唱劇,毋但予囡仔自然去感受台語的聲韻,這款故事的題材、表現的形式、擬人化的動物角色,嘛成做是上好的文化教育、音樂教育佮環境教育。

李勤岸:青春人面冊:性命故事ê書寫經驗

  李勤岸老師這幾冬來誠有計畫佇人面冊(Facebook)頂懸書寫,嘛有共遮的作品佮相片出做冊矣。第三工的課程,李老師就鼓勵逐家鬥陣用台語來寫家己的性命故事。人面冊的書寫經驗逐个人加減攏有,短短的文字,配合著圖抑是影片,就會當成做家己的作品。閣有一點就是逐家透過人面冊,會當共同創作,袂輸討論會仝款。一進入課程,李老師分享的第一篇作品〈小學ê男朋友女朋友〉就引起熱烈的討論,逐家攏想欲發表意見。予李老師笑講:「恁看,逐家攏搶欲創作,等咧下課,就會當開始寫家己的故事。」

1

↑李勤岸老師

楊允言:電腦時代的台語文寫作

  經過頂一節課的鼓舞,逐家攏等袂赴欲開始用台語文來寫作。楊允言老師就欲來共咱紹介一寡寫台語文的工具,有輸入法、線頂詞典,猶有真濟除了人面冊以外的平台欲紹介予逐家。電腦結合網路,予咱佮全世界的人攏會當即時交流,較袂受著空間佮時間的限制。最後,楊老師講著台語「語詞流失緊,新詞補充慢」的問題。因為台語捌經過一段時間的被壓制,真濟詞彙無法度綴著時代,所以希望逐家攏會當做伙動起來,透過電腦、網路,來保存強欲流失的台語,同齊討論新的台語詞。

1

↑楊允言老師、姚嘉文老師

陳正雄:葉石濤文學地景踏查

  第三工下晡,咱請著陳正雄老師領學員行出教室,以作家葉石濤做主題,來認捌台南。

  「這是個適於人們做夢、幹活、戀愛、結婚,悠然過日子的好地方。」這句話真濟人捌聽過,毋過誠濟人毋知影,按呢形容台南的就是葉石濤。葉石濤的《台灣文學史綱》建立了以台灣為主體的文學史觀,予彭瑞金比做是「為台灣文學點燈、開路、立座標」的重要評論家。伊的小說創作嘛誠豐富,而且對日本時代,伊才十六歲的時就開始創作,一直寫到八十幾歲。佇伊的作品內底,寫著真濟府城的景致。所以,佇陳正雄老師和兩位導覽的李老師、陳老師的引之下,咱就綴著葉石濤的文學跤跡來認捌台南。

↑陳正雄老師

姚嘉文:台文寫作的幾个問題

  上尾仔一工的課,邀請著前考試院長姚嘉文來分享伊的台文寫作經驗,順紲紹介伊拄出版的新冊《烏水溝》台文版。《台灣七色記》系列,是姚老師得著得著吳三連文藝獎的作品。作品翻譯做台文的過程,姚老師嘛親身參與,閣再加上長期攏有咧關心台語文運動,所以伊佇這節課欲提出一寡看法來佮逐家分享,伊希望建立一套台文的寫作範本模式,嘛莫因為一寡少用的漢字,煞加添學台語的困難。

1

↑陳明仁老師頒發結業證書

*全文刊於《台語教育報》第50期(2016.08)

意見反應信箱:service@king-an.com.tw
Copyright © 2012 真平企業有限公司 版權所有.禁止擅自轉貼