大觀園:影片 

畢業季.感恩季

    

 

 

   

我已經大漢MV下載   我已經大漢mp3下載  我已經大漢曲譜下載

 

------------------------(同場加映)-------------------------

驪歌   月雲

同窗六年  今日相辭

心內難捨難離

雖然從此  各分東西

希望友誼常在

誠心祝福  望你珍重

此去前途無量

誠心祝福  望你上進

將來美夢成真

 

 

驪歌MV下載    驪歌mp3下載   

 

大觀園:詩歌精選:現代詩 

收驚

王灝

驚驚驚

昨暝狗吠遐大聲

驚驚驚

最近地動動袂煞

害阮的寶貝仔囝

煞來拍著驚

去予人來收驚

收驚婆真靈聖

叫我攢米佮一領衫

手提清香向神來拜請

收驚咒唸甲遐大聲

這爿趕 彼爿喝

所有的驚惶

所有的魔煞

攏總收定定

 

*全文刊於《海翁台語文學雜誌》第134期

大觀園:俗諺 

【24節氣:小寒(siáu-hân)】

新曆1月初5/初6/初7


簡介──

小寒神是八爺范無救,伊原本就是無情的鬼差,予人看著伊就規身軀起交懍恂。這馬猶毋是上寒的時陣,毋過梅花已經開始開矣。

 

俗語──

小寒大冷,人馬安。小寒就愛有寒的感覺,按呢才有合氣候,這年才會平安。


人文活動──

食八寶糜。舊曆12月初8有食八寶糜的風俗,糜內底參秫米、龍眼乾、紅棗、塗豆……等等8種食材,煮做甜糜來祭拜祖先。


當令食材──

鰻仔。秋冬的鰻仔當好食,因為鰻仔歹飼,所以價數嘛無俗。
山茄(洛神花)。12月到1月花蓮、臺東的山茄大出。
紅豆。1月屏東萬丹紅豆大出。

大觀園:詩歌精選:現代詩 

瓊花

徐禎偵

攬抱著月光的鏡
你的形影佇阮的心肝穎仔
傱來傱去
思戀的花
敢有徙栽去到你的心肝底
若無
伊就會
綴著拍殕光的日頭
沓沓仔 沓沓仔
蔫去

 

*全文刊於《海翁台語文學雜誌》第165期

大觀園:囡仔古 

牛的生日

林佳蓉

  佇臺灣,聽講冬節彼日就是牛的生日。為啥物冬節會是牛的生日呢?這有一个誠趣味的傳說。

  足久足久以前,有一个木匠,人攏叫伊「墨斗公」。佇伊所蹛的庄頭遐的田塗原本攏足肥的。作穡人只要共種子掖去田裡,無需要摃肥,嘛毋免薅草,就會當坐落來等收成。所以遮的作穡人規工閒閒無代誌,in就相招去墨斗公的店裡泡茶開講。

  毋過,墨斗公有足濟工課欲做,日子過了足無閒的,遮的作穡人規工攏走來去伊的店裡泡茶開講,伊去予in吵甲完全無法度做工課,心內足受氣的。共in趕閣趕袂走,這予伊真傷腦筋。

  有一工,in閣來墨斗公的店裡大聲細聲咧話仙,一點仔都無共墨斗公看在眼內,墨斗公予遮的作穡人氣甲擋袂牢,就提一包柴幼仔,偷偷交予徒弟,交代伊:「你逐工透早搣一點點仔掖入去作穡人的田裡。愛偷偷去,千萬毋通予人看著。」遮的柴幼仔只要掖入去田裡,就會變成雜草。墨斗公原本的用意,是欲愛遮的作穡人較骨力咧,逐工攏去田裡薅草,按呢就袂規工閒閒無代誌,走去伊的店裡開講,害伊攏無法度做代誌。徒弟一聲共應好,提著這包柴幼仔,閣轉工一透早天猶未光就走去田裡,搣一點點仔掖入去田裡。

  啥人知影,頭起先,這个徒弟攏有按照墨斗公的交代,逐工透早去掖柴幼仔。毋過過無幾工,伊就嫌忝閣費氣。伊佮遐的作穡人仝款,嘛是足貧惰的。「師父叫我逐工攏搣一點點仔掖佇田裡有夠麻煩的。」伊無想欲遮爾麻煩,就規氣全部做一擺掖入去田裡。想袂到,所有的田攏發足濟、足旺的雜草,害遐的稻仔攏蔫去矣。作穡人看著in的田園竟然變成按呢,大聲哀:「害矣!阮是欲按怎生活?天公伯仔!你汰欲按呢對待阮?」

  墨斗公看著徒弟竟然無照伊的指示做代誌,害作穡人的田攏蔫去,伊真受氣,就用法術共徒弟變成一隻牛,叫伊去共遐的作穡人鬥薅草,將功贖罪,補償in的損失。

  毋過,墨斗公的徒弟變成牛了後,伊貧惰的個性猶是無改變。作穡人叫伊駛田,伊攏有一大堆藉口:「今仔日我足忝的」、「我今仔日感冒矣」,啥物藉口攏想會出來。無就是共作穡人討好食物,講:「你攏無攢一頓好料的予我食,我汰會有氣力共你鬥相共咧?」伊甚至閣佮作穡人講定,駛田的時,便若行一逝,就愛予伊食紅龜粿,抑是紅圓仔、紅豆湯等等的好料,抑若無,伊就欲抗議,無愛共in駛田。作穡人若無照伊的意思做,伊就毋肯動。

  作穡人看牛遮爾歹差教,就去廟裡共佛祖講,希望佛祖會當鬥相共,佛祖看這隻牛竟然遮爾囂俳,實在真毋是款,伊就佇牛的下頦釘一枝釘仔,予伊無法度閣開喙,嘛無法度閣怨東怨西(所以這馬牛的下頦攏有一粒看起來親像痣的記號)。因為牛佮意食圓仔,所以逐家就選冬節這工做牛的生日。

  佇冬節這工,作穡人除了會飼圓仔予伊食以外,閣會佇牛角、額頭頂懸攏黏一粒「圓仔釘」。同時,為著感謝牛一年來的辛勞,冬節這工嘛一定會予伊爽快的歇睏一工。

 

*全文刊於《海翁台語文學雜誌》第180期

大觀園:演講稿 

莫講無可能

鄒淑霞、秝黛

  各位評判老師,各位同學,逐家好。我是第1號,今仔日我欲演講的題目是:「莫講無可能」

  俗語講:「天下無難事,只驚有心人。」意思是講,咱人若是拄著困難,千萬毋通放棄,只要咱用心、認真去做,絕對無彼號做袂成功的代誌。事無做袂成,躊躇不決,對代誌並無啥物幫助。「莫講無可能」,做落去就著矣啦!

  舊年歇熱我拄仔國校畢業,人是閒甲掠蝨母相咬,規工佇厝裡咧用電腦,雄雄發現網路頂懸的YouTube蓋趣味,內底的影片百百款,閣全全是普通人家己製作,根本毋是啥物專家就共影片做甲削削叫。彼當陣我就想講,我敢會曉做?敢會使來試看覓咧?

  我隨去買冊研究,才發現講欲完成一齣影片是遐爾仔困難的代誌,對選主題、翕影片,到製作、字幕佮音樂,遮離離硞硞的攏愛家己來。拍拚一禮拜,我做出頭一齣影片矣!正港是:「有心拍鐵,鐵成針。」我歡喜甲喙笑目笑,隨提去共阮母仔展寶,想袂到伊煞講:「你做這是啥物碗糕?音樂佮影片攏對無好勢,根本都猶無算是一齣影片!」我聽甲夭壽仔傷心,毋過我無失志,閣去參考別人的作品,一擺閣一擺試做,想袂到「無米閣拄著閏月」,拄仔咧欲做好的時陣,規台電腦煞雄雄歹去,救袂轉來。我目屎四淋垂,那哭那講:「敢講我誠實遮爾肉跤?敢講我真正無可能完成一齣影片?」這个時陣,阮阿爸共我講:「莫講無可能,你攏已經拍拚到遮矣,這馬哪通放棄咧?」

  是啦,莫講無可能,我重新對頭學起,佇網路頂揣資料,閣去請教會曉做影片的老師,「石頭浸久會上青苔」,這馬我已經是網路頂的影片創作者矣,就是講我有家己的網路頻道,嘛已經有超過百外个人是我固定的觀眾喔﹗

  事無做袂成,路無行袂到,咱只要把握重要的原則佮方向,那行那看,那做那改,就一定會當成功,達成目標。「有心拍石石會萎」,咱愛相信家己,毋管拄著任何的困難,若是用著方式,而且有堅持、認真去做,相信萬項代誌攏有成功的機會,莫講無可能!予咱逐家互相鼓勵,向前行。

 

*全文刊於《海翁台語文學雜誌》第185期

大觀園:散文隨筆 

會做較贏袂做

謝慈愛

  阿母後頭厝散赤,二十歲就嫁入一个大家族;伊性地單純恬靜,淡薄仔無自信。阿姆是細漢就抱轉來飼ê新婦仔王,佮小叔小姑做陣大漢敢若大姊頭仔,人情世事攏足gâu料理。屘嬸仔後頭厝有錢有勢,嫁粧足濟足派頭。阿媽身體一向無順序,規工佇佛堂念經拜佛,無管厝內的代誌,早就攏交權予阿姆扞家(huānn-ke),大細項代誌攏是阿姆拍派,無人敢有異議;誰知阿姆煞「大細目,懸低耳」對屘嬸仔真客氣,卻是共阿母當做下跤手人喝咻。阿母知影家己逐項攏輸人忝忝,只有認命的份,佇阿姆面前更加細膩更加斟酌,盡量共分著的穡頭做予好勢。


  阿母恬恬仔承受無公平的家事分配;伊雖罔外表看起來軟汫軟汫,其實內心真堅強;干焦佇忝ê時才細聲埋怨幾句爾爾,從來毋捌想欲佮人計較。顛倒定定安慰家己「會做較贏袂做,較贏䖙咧予人伺候」,她堅持相信人愈做會愈健康;透早到暗親像干樂踅玲瑯,表示身體健康勇壯無病疼啊!反倒轉來感激阿姆予伊學習磨練的機會。雖然規工手做袂煞,已經結趼起疱,伊嘛歡頭喜面,已經學著誠濟年節的煮食、炊粿、祭祖禮儀佮田穡….對初初嫁來的「笨跤笨手」,磨練幾若冬了後,沓沓仔變成今仔日的綿爛佮勥跤。


  後來阿爸in兄弟分家,阿母已經是一个真gâu的內助,毋但照顧序大、囡仔、料理三頓閣兼飼豬飼雞鴨、落田種菜蔬,補貼厝內的開銷,內外發落甲真四序,厝邊頭尾呵咾甲觸舌。阿母時常對阮兄弟姊妹講:「做牛著拖,做人著磨」,加做絕對袂食虧的啦!


  會記得有一改下班,我氣怫怫傱轉厝內,受氣頭家職務拍派無公平工課量增加真濟,薪水卻是加無幾箍,想要辭掉頭路;為啥物同事工課少閣輕鬆,領的錢煞佮我仝款咧!阿母猶原用彼句話共阮講:「會做較贏袂做」敢講你向望頭家共你分對能力低的彼爿?閣再講親手做的過程,一點一滴所學著的較撆紮,囥佇頭殼內別人攏搶袂走,「忍氣求財,激氣相刣」毋通閣氣矣,有話好好仔參詳寬寬仔講。


  「會做較贏袂做」這句話毋但陪伴阿母行過辛苦歲月,嘛提醒著阮兄弟姊妹,見若拄著無公平待遇的時,定著愛吞忍閣較拍拚啦!

 

*全文刊於《海翁台語文學雜誌》第184期

大觀園:俗諺 

【24節氣:大雪(tāi-suat)】

新曆12月初6/初7/初8


簡介──

大雪神攑大旗仔擛咧擛咧,天氣比小雪閣較寒。臺灣愛等寒流來,才有機會佇懸山看著雪。

俗語──

頂初三,下十八,早潮晏退。佇舊曆11月初3佮18,流水會提早漲,較慢退。


人文活動──

大雪的天氣真寒,不時有寒流報到,愛注意穿插,毋通去予寒著。寒人的時,雨大部份攏落佇北部佮東部,中南部的水庫這時陣定定焦焦,所以有「冬天雨,較貴麻油」的俗語,這个時陣就愛節約用水喔!


當令食材──

菊花。12月到3月臺灣的菊花當著時,苗栗銅鑼、屏東內埔攏有種,會當用來泡茶。
塗豆。這陣的塗豆當著時,炊予燒燒的塗豆芳閣甜,真好食。

大觀園:俗諺 

【24節氣:小雪(siáu-suat)】

新曆11月21/22/23

簡介──1

小雪神提旗仔共寒冷的霜雪擛來,有的國家會開始落雪,臺灣的天氣嘛真寒,毋過猶袂落雪,恆春會出現落山風。

俗語──

月內若霆雷,豬牛飼袂肥。小雪若聽著霆雷公,代表風不調、雨不順,豬牛會發生災厄。


人文活動──

謝平安。舊曆10月以後,臺灣各地的廟寺會舉辦「謝平安」的活動,感謝神明一冬來的保庇。


當令食材──

烏魚。「小雪小到,大雪大到,冬節過十工,烏魚就無矣。」烏魚佇小雪前後來到臺灣海峽。烏魚予討海人叫做「烏金」,烏魚卵曝焦就是好食的烏魚子。

大觀園:散文隨筆 

手足情 

許立昌

  人講:「拍虎掠賊親兄弟」,阿爸、阿母干焦生阮兩兄弟,小弟自細漢歹育飼,枵也吼,飽也吵,欲睏就硞硞花,睏無飽嘛亂,不時面仔漚屎面漚屎面,像欠伊偌濟錢。佮同學鬥陣定定閣會激面腔,做工課是慄慄掣,無歡喜就蹔跤趒蹄,規工面凊凊,同學無啥欲插(tshap)伊,阿母看甲是氣身惱(lóo)命,剃頭店公休--無你法(無理髮)。

  有ㄧ擺,佮小弟耍甲熱怫怫,暢甲毋知民國幾年,無細膩共阿母上寶惜的茶甌摃摃破,阿母掠準萬惡罪魁是小弟,氣甲心火著共小弟罵甲臭頭。彼一擺小弟ㄧ句話嘛無應,恬恬予阿母罵。落尾,小弟講:驚我予阿母罵毋敢出聲。我無講啥,毋過「大是兄,細是弟」,兄哥著愛疼小弟,煞予小弟來擔當我的毋著,實在真見笑,覕佇棉被內目屎流目屎滴吼足久。

  一工,小弟照原定定毋寫宿題,阿母就竹仔枝炒肉絲先修理小弟,紲落來我掃著風颱尾做伙罵。後來小弟若欲寫字就一个面若苦瓜,我毋甘就偷偷仔替伊寫功課,結局,小弟兩改月考考甲塗塗塗,誠濟字寫袂路來,就按呢代誌煏空。阿母起雷公面誠受氣講:「鴨卵較密嘛有縫,做人老實才有底,白賊抑是大跤假細蹄,人格破產,一世人就疊磚仔--抾捔(khioh-kak8)。做兄哥疼小弟是當然,毋閣若是「豬母牽去牛墟」,疼伊變害伊,兩人相牽落湳田,死死仝一窟!枉費晟養恁。」

  彼年年尾,小弟破病蹛院幾若工,我坐也毋是,徛嘛毋是,食物無滋味,tshit-thô無趣味,一箍人懶屍懶屍踅神踅神。定定問阿媽小弟底時會轉來,阿媽就講:「恁兩个司公象桮,定定熱火火耍甲強欲共厝瓦掀去,這馬咧心悶乎?恁愛較大才咧,毋通予恁母仔操煩!」

  「阿媽!我足想小弟,昨昏閣眠夢小弟咧共我叫!」

  去病院看小弟,伊siān siān lám虛,足毋甘的,兩人煞攬咧吼,有一睏仔,小弟才講:「阿兄,以前我無乖攏惹你受氣,你攏讓我,我知影毋著,請你原諒我!」我講:「你無遐bái,你足古錐,予我足濟快樂!」

  「阿兄!這幾工我人艱苦,我看著阿母煩惱甲面憂面結,加足濟枝白頭毛,我知影我逐工激天天,歹脾氣、火烌性,予阿爸阿母費心神。而且同學、厝邊的囡仔看我就閃,我無朋友。我知影我無好,這擺破病是天公伯共我責罰,我一定改過做好囝!」我講:「破病毋是天公仔共你責罰,毋過破病予你加捌代誌,真正是跋一倒抾著金雞母!你是我上麻吉的好小弟。」

  過一兩工小弟病離流啊,個性行為嘛加足正經,朋友加足濟,阿母雖然工課無閒,看阮兩个學乖,心肝就袂結規丸。(2017.02.26.)

 

*全文刊於《海翁台語文學雜誌》第184期

頁數:  1 2 3 4 5 6 7 8 9 10
意見反應信箱:service@king-an.com.tw
Copyright © 2012 真平企業有限公司 版權所有.禁止擅自轉貼