大觀園:生活用語 

失智症

  台灣已經進入高齡化的社會,真濟老人福利、長期照護的問題攏需要更加重視。失智症(Dementia)是一種腦部的病症,過去定定予人掠準是人食老以後的正常現象,閣會笑人是「老番顛」。

1

  2015年,全世界失智症的患者有4680萬个,平均3秒就有一个人著失智症。佇台灣,有25萬个失智症的患者,差不多一百个人就有一个人著。失智症毋但會影響記持,包括著語言能力、空間感、個性攏會受著影響,甚至有人會出現幻想。過去因為對這款病症無了解,社會嘛無對患者較友善的環境,厝內人只好用限制行動的方式來保護患者。

  佇荷蘭有一間超市,為著欲打造一个對失智症患者友善的環境,in請專家來上課,予員工對失智症會當有較深的認捌,另外,閣進行情境的測驗。經過一擺閣一擺練習、討論佮分享,希望予失智症的患者來到超市的時,會當順利買著家己欲買的物件。

  佇台灣,咱對一寡病症(親像精神方面的病抑是愛滋病等等)的討論較少,有當時仔甚至會驚人知。毋過就是因為無用正確的態度去面對,致使社會上常在用無正常的眼光來看遮的患者抑是家屬,予病人失去尊嚴,閣較免講欲建立按怎友善的環境矣。其實辛苦病疼攏是人生當中誠正常的代誌,咱逐个人可能有一工攏會搪著,若到彼一工,你希望別人按怎看你咧?

*參考資料:台灣失智症協會

大觀園:風土民情 

北投公園

  北投公園最近因為pokemon go這个遊戲,吸引誠濟人的注意。若是小注意一下,會當發現這座公園已經有超過一百冬的歷史矣喔。北投公園設佇1911年,是台灣的第一座溫泉公園,嘛是台北市的第三座公園,頭前的兩座是圓山仔公園佮台北公園(這馬的228和平公園)。

 1

  後來,新北投鐵路通車,旅客欲來遮洗溫泉閣較方便,所以,嘛有人共遮叫做新北投公園。公園內有一座雁形的噴水池,進前頂面彼隻銅做的雁仔捌去予人偷提去,一直到2013年,才閣請師傅照較早的形重新雕刻,替誠濟老北投人走揣in的記持。

 

  佇北投公園遮,毋但有溫泉博物館、梅庭、地熱谷、凱達格蘭文化館遮的景點,猶有今年拄入選世界上媠的十間圖書館之一的北投圖書館。後擺來遮掠寶的時,嘛會當順紲來遮的景點行行咧喔。

大觀園:生活用語 

菁仔欉 

  菁仔欉,除了是指檳榔樹,嘛定定用來形容人。啥物款的人會予人講是菁仔欉咧?

  1.做代誌兇兇狂狂1

  2.毋捌見過世面

 

  這款的人,嘛會予人講是菁仔欉。毋過這檳榔樹是按怎會用來形容人咧?佇日本時代,捌發行過一款「台灣銀行券」的銀票,內底面額一百箍的銀票,頂懸就有印兩欉「菁仔欉」,誠有台灣的特色。

  毋過佇彼个老師一個月薪水干焦30-50箍的年代,逐家平常時會用著一百箍銀票的機會是真少,所以若看著這張青色的銀票,攏感覺真稀罕。聽講彼陣有一寡小姐咧揀對象的時,對方若是無看過菁仔欉的,人是無愛喔。

 

  沓沓仔,「菁仔欉」就予人用來形容毋捌見過世面,抑是小可代誌就大驚小怪、兇兇狂狂的人囉。

大觀園:生活用語 

台語唸看覓(四)

神氣 → 囂俳、風神

爛泥巴 → 漉糊糜仔

幫忙 → 鬥跤手

聽不懂 → 聽無

胡說八道 → 畫虎、練痟話

削鳳梨 → 刣王梨

燒開水 → 燃滾水

小鴨子 → 鴨咪仔

我丈夫 → 阮翁

火車站 → 火車頭

大觀園:生活用語 

來食磅米芳

  今仔日欲逐家來做磅米芳,就是『爆米花』。芳貢貢的磅米芳,是真濟大人囡仔攏愛食的四秀仔。

  毋過你敢知影,金爍爍的番麥,是按怎會變做白phau-phau的磅米芳咧?幾若千冬前,番麥是蹛佇美洲的印地安人主要的作物,有一工,印地安人無細膩共拄擘好的番麥囥佇火的邊仔,過無偌久,煞聽著一陣pi-pi-po̍k-po̍k的聲音,越頭一下看,塗跤出現一堆白色的物件,而且,鼻起來閣真芳呢,這就是上早的磅米芳。

 1

  原來,番麥的殼雖然真(ting7),毋過,內底的澱粉佮水份,若拄著高溫,就會開始變化,產生真大的壓力。等到溫度愈來愈懸,番麥的殼袂堪得內部遮大的壓力,就會「爆」一聲,規个煏開,成做咱所看著的磅米芳。

  講著磅米芳,咱就會想著看電影,那看電影那食磅米芳,是一件真享受的代誌。佮其他的食物比起來,磅米芳的材料簡單,做法嘛袂複雜,慢慢仔就變成看電影的時,真普遍的一項四秀仔。這馬,就來看欲按怎做磅米芳。

大觀園:民間故事 

燒紙錢的故事(二) 

阿茹

  傳說有一位管雲雨的龍王閒閒無代誌就穿便服下凡去踅踅看看,結果拄著一个算命仙,這位算命仙真厲害,一看著龍王,毋但隨講出伊的真正身份,而且閣洩露天機講出天帝佇某年某月某日某時會命令龍王來遮落雨,連落偌濟雨,算命仙嘛一清二楚。

  龍王聽了半信半疑,就和伊相輸,想袂到伊一轉去龍王殿就隨接著玉帝傳旨來,時間和雨量攏去予算命仙臆甲準準準。龍王驚一趒,這聲伊的面子毋就卸了了,為著欲顧全面子,龍王就偷改玉帝的命令,結果致使城內做大水,真濟百姓的厝去予大水沖走去,有的甚至家破人亡,玉帝知影了後真受氣,就下令欲將龍王斬首,伊並且指定當朝的丞相魏徵來做斬龍官。

1

  龍王想來想去,如今之計就是托夢去拜託唐太宗,請伊佇斬首彼工共魏徵纏跤絆手,莫予伊離開皇宮,上天庭來監斬,按呢凡勢就會當逃過死罪。唐太宗袂堪得龍王的苦苦哀求,勉強答應。毋過,千算萬算毋值天一劃。問斬彼工,唐太宗確實共魏徵留佇皇宮陪伊行棋,結果魏徵那行那盹龜,唐太宗想講只要魏徵人佇遮,予伊小睏一下無要緊,想袂到魏徵的魂魄飛去天庭問斬龍王。龍王死目無願瞌,就來對唐太宗膏膏纏,害太宗睏袂落眠,有一擺竟然去予龍王拖去遊地府,遇著伊開疆拓土時戰死的兵將,in變成孤魂野鬼佇地府受苦,太宗看了真不忍心,轉去陽關以後,就召集高僧來舉行法事超渡遐的亡魂,而且閣製作紙錢來燒予地府的孤魂野鬼,後來,逐家就學太宗燒紙錢來祭拜,一直到今仔日。

*全文刊於海翁台語文學月刊第105期

大觀園:民間故事 

燒紙錢的故事(一) 

阿茹

  蔡倫發明紙以後,伊的生理沖沖滾,來買紙的人濟甲若貓毛,逐工攏人客甲規厝間,蔡倫因為按呢趁大錢。伊的阿兄蔡莫和阿嫂慧娘真欣羨,嘛想欲學蔡倫造紙,貧惰的蔡莫伊工夫學無夠就趕欲開店賣紙,結果一造出來的紙真粗,和蔡倫的紙比起來,品質差真濟,人客一工比一工少,in翁仔某看著滿厝間的粗紙煩惱甲袂食袂睏,毋知欲按怎才好。

  有一工,慧娘想著一條妙計,伊共蔡莫叫來,佇伊的耳空邊tshi-tshih8-tshuh8-tshuh8,叫伊照計畫進行。

  這工暗時,厝邊隔壁當咧食暗的時,雄雄聽著蔡莫咧大聲喝慧娘的名,當逐家趕去蔡家的時,卻是看著慧娘已經倒佇眠床頂崁白布矣,蔡莫坐佇塗跤哭甲目屎流目屎滴,逐家攏想袂到慧娘竟然無病無疼就來過身去。隔工早時,蔡莫共慧娘抱入去棺柴內,伊的目屎猶原掰袂離,佇邊仔鬥相共的厝邊嘛目箍紅紅,蔡莫真毋甘看慧娘最後一擺,然後才共棺柴蓋崁起來,悲痛的情緒無法度排解,伊開始大聲吼,那吼那共囤佇壁邊的粗紙提來燒,一面燒紙一面唸慧娘的名。

1

  這个時陣,棺柴內竟然發出聲音來,叩叩叩,逐家攏掣一趒,慧娘的聲音對棺柴內傳出來,「緊拍開,我轉來矣。」逐家你看我,我看你,驚甲面青喙脣白,「緊拍開啊!我是慧娘。」無毋著,確實是慧娘的聲音,蔡莫緊行向前,共棺柴蓋拍開,一拍開,慧娘規个人坐起來,害眾人目睭擘甲真大蕊,毋敢相信慧娘竟然還魂矣。

  慧娘一對棺柴內爬出來,就共蔡莫攬牢牢,「翁的,多謝你呢!」逐家聽了莫名其妙,毋知慧娘是按怎欲多謝蔡莫,蔡莫嘛佯生(tènn-tshenn)*,刁故意問:「你為啥物共我說多謝?」慧娘看厝邊頭尾真好玄,就沓沓仔講出伊「死了後」的遭遇:原來伊去到陰間,閻羅王判伊拖石磨受苦罪,毋過因為蔡莫燒真濟紙錢予伊,所以小鬼仔攏相爭欲替伊拖磨,伊閣共紙錢提去送予閻羅王,閻王一歡喜,就送伊還魂轉來陽間。

  蔡莫看眾人聽甲耳仔覆覆,就大聲問慧娘:「我無燒錢予妳啊?咱散甲強欲去予鬼拖去,我汰有錢燒予妳咧?」慧娘就指壁邊的粗紙,「彼就是紙錢啊!陰間共紙當做錢呢。」蔡莫一聽了,就隨去mooh兩捆紙來燒,喙內踅踅念:「阿爹阿娘,這是欲燒予恁的,希望恁佇陰間會當減受苦加享福。」厝邊看慧娘轉死為生,閣聽伊共陰間的遭遇講甲有影有跡,攏深信不疑,逐个攏兩步做一步趕緊轉去厝裡提錢來買粗紙,想欲燒予死去的親人。

  結果消息傳出去了後,蔡莫的紙一目仔就賣了矣。

  因為慧娘還陽的日子是舊曆七月十五,所以逐冬若到這工,逐家攏會燒紙錢來祭拜祖先,時間一久,就變成一種風俗矣。

 

*佯生:讀音tènn-tshenn/tìnn-tshinn,裝蒜。

 

*全文刊於海翁台語文學月刊第105期

大觀園:生活用語 

假的

台語漢字:假的1

華語漢字:假的

台羅拼音:ké—ê

 

相關語詞

假仙(ké-sian)

解釋:假裝、裝蒜

例句:你明明就真歡喜,莫閣假仙矣(你明明就很高興,別再裝了)

 

假(ké-gâu)

解釋:自作聰明、逞強

例句:你莫咧假(你不要自作聰明。)

例句:你若是無法度,就毋通踮遐咧假(你若是沒有辦法,就不要在那裡逞強)

大觀園:俗諺 

【24節氣:大暑(tāi-sú)】

新曆7月22/23

簡介──

提大火盤的小鬼是這个時陣的節氣神,表示天氣大熱。第二期的田已經佈好。現此時風颱真濟,愛注意氣象報告。

 

俗語──

 

大暑熱袂透,大水風颱到。大暑是一年上熱的時陣,若是這時無夠熱

1

,就代表天氣袂順,紲落來的日子,天災可能會真濟。

 

人文活動──

半年節。舊曆6月是全年的一半,早期來自漳州佮泉州同安的人有過半年節的風俗,通常佇6月初1抑是15的時會拜拜、食「半年圓」。「半年圓」代表甜蜜佮團圓。

 

當令食材──

王梨。「大暑食王梨。」臺南關廟、屏東、高雄、嘉義、南投的王梨攏真有名。王梨酥是臺灣上出名的伴手。

大觀園:詩歌精選:囡仔詩 

風颱

林心智

 

1


 

 

 

 

 

 

 

 

風颱,勇伯仔風颱

你面仔看著真熟悉

若像逐年你攏有來

下暗你敢欲留踮阮這ê所在?

抑是你已經另外有安排?

 

 

 *海翁台語文教學季刊第四期(2009.06.10)

頁數:  6 7 8 9 10 11 12 13 14 15
意見反應信箱:service@king-an.com.tw
Copyright © 2012 真平企業有限公司 版權所有.禁止擅自轉貼