大觀園:詩歌精選:現代詩 

〈行咱的路──詩寫黃勁連〉

黃明峯

彼跡,你是袂閣去
因為聽袂慣勢
彼款的雜唸
因為詩句漸漸仔無精神

彼時,你猶少年
佇他鄉拍拚、走傱
總是感覺世事稀微
鬱卒不時硩傷胸坎

當若暗暝,月娘倒鉤
冷風不時削樹成箭,射著
孤單的人影,射著
青春的夢

人影,夜夜咧陷眠
青春,夢中咧厭氣
歷史的跤頭趺勻勻仔抽疼
思念故鄉的心
已經咧發炎

你想講:不如轉去
轉去潭仔墘
理想佮大海仝款澎湃
佇五府千歲庇佑的所在
放膽文章拚命酒
大聲來喝咻
大力拍鑼兼挵鼓
搖醒土地
振動夢

夢振動
日頭拄好,適合
曠闊的心掖種歌詩
向望文學的新氣味
湠開
在地的風景

踮佇鹽分地帶
你講:有一種堅持
叫做行咱的路
有一種姿勢
會當聽著──
江湖的呵咾

 

*全文刊於《海翁台語文學雜誌》第182期

大觀園:詩歌精選:現代詩 

白內障

岩  上

毋是世界拒絕你
是你家己內臟已經故障
看世界外景的目睭球仔
變形
一切陷入茫霧中

茫霧的世界
嘛有美麗的一面
親像黃昏的景色
佈置一日上珍貴的時刻
分袂清
日時抑是暗時

是烏的抑是白的
也已經無重要
因為看世界真相的機器
內部已經破裂
無 人
會曉修理

 

*全文刊於《海翁台語文學雜誌》第181期

大觀園:散文隨筆 

紅豆仔的記持

 林美麗

  「阮大寮的紅豆仔足衝(tshìng)的呢!而且阮兜的紅豆仔是有機種作的喔,你今年欲留幾斤?」因為舊年綴無著陣,tann,趁紅豆仔拄收成,朋友就趕緊敲電話來問看今年我欲買偌濟。

  毋是伊欲改途賣紅豆,實在是為著無愛予販仔佇遐苛價數。伊共in外家種的紅豆仔攏貿落來,拜託學校的同事佮親情五十鬥相共銷銷咧,彼是in後頭兩个鬥鬥咧百五歲的爸母,用有機的、無毒的方式種出來的「愛心紅豆」,哪會使凊凊彩彩予販仔佇遐烏白𠞩(tsuî)?

  做囡仔的時阮兜嘛有作穡,誠知影農作物若欲有好收成,定著愛用真濟心神來照顧。就講種紅豆仔就好,對墊子開始,掖肥料、澍藥仔、薅豆仔草……步步項項都愛照起工。尤其是收成的時,若無用機械採收就愛家己摃。割好的紅豆仔愛收做堆,下底苴帆仔布通防水,趁中晝日頭較猛,共曝甲酥酥的豆莢用耞仔(kénn-á)摃。

  耞仔是共兩節柴棍仔穿空,用麻索仔縛做活動的家私,欲摃的時搦這頭對豆莢共撼落去(hám--lueh),彼頭的柴棍仔就會共豆仔莢摃甲必開。紅豆仔一粒一粒若對必開的豆莢內底跳出來,pi-pi-pok8-pok8,若像咧跳曼波。阮六个囡仔,隨人撿一位坐,摃甲豆莢虯虯、碎碎,豆仔嘛落甲差不多矣,才共豆稿弄弄咧擲去邊仔,通好燒掉漚做肥。

  逐年紅豆的收成攏佇歇寒的時。阿母為著欲省倩工的錢,攏將阮當做囡仔工咧使派。同學佇街裡𨑨迌,阮佇田裡浞(tshiok8)田塗;人咧大摒掃,阮佇田裡割紅豆;看人過年穿新衫放炮仔,阮是佇田裡攑耞仔咧摃紅豆。哎!這是作穡人的悲哀,若欲有利純,步步項項就愛家己來,所以自細漢阮就真知影無做無通食的道理。

  是講囡仔人跤手猛掠,兩三下手工課就做甲四序四序,尤其是看著布篷頂面一粒一粒仁仁仁的紅豆仔,共阿母的笑容炤甲甜甜甜,阮囡仔人嘛會因為豐收來感覺歡喜,艱苦一屑仔嘛無算啥物!

*全文刊於《海翁台語文學雜誌》第172期

大觀園:演講稿 

臺灣上媠的風景

王崇憲

臺灣好,臺灣是寶島,景緻媠閣好,玉山懸是伴雲波,合歡山有雺霧鎖
臺灣好,臺灣是寶島,風景佇大廟,歌仔戲閣唱山歌,臺灣臺灣人情多

  各位評判先生,各位同學,逐家好!我是□號,今仔日,我所欲演講的題目是:臺灣上媠的風景。

  臺灣好,臺灣好,臺灣有山有水,實在是好地理。
  臺灣的山,景緻是通人知:玉山媠閣懸,阿里山頂日出是世界級;
  臺灣的水,四箍輾轉,花蓮港映海濤,東海岸浪叫更,鵝鸞鼻照海墘。
  廬山泉、墾丁水,風景世界第一等!

  臺灣是咱的母親,我為著欲親身體會臺灣這塊土地,佇大一的時陣,就加入登山社,我想欲佇讀大學的期間,用我的雙跤,一步一步去體會臺灣的媠。佇咧足百山的時陣,我就感覺,臺灣的山,風景真正是有夠媠的。像佇大一的暑假,阮對花蓮出發去足百臺東的金針山,雖然山無蓋懸,但是阮佇遐,看著滿山的金針,黃錦錦的金針花,開甲滿四界,風一吹,金針花就綴咧跳舞……這種景緻,無法度形容,一定愛親身用目睭看,才有法度體會!金針山的對面,看出去就是太平洋。海的色水,是不可思議的藍,藍甲看袂赴,藍甲有夠媠!我徛佇一个涼亭看過去,一爿是金黃色的山佮花,一爿是藍藍藍的海水,有花有山閣有水,我咧想,這應該就是臺灣上媠的風景矣!

  頂年,登山社計畫欲去足百玉山,我嘛有報名!足百玉山,真正是我人生中一个足大的考驗,阮用咧欲八點鐘的時間,才對八通關行到排雲山莊,而且我閣得著高山症,愈行頭愈疼。食暗頓了後,阮足早就去睏矣,因為隔工的半暝仔三點,阮就愛輕裝出發去玉山頂。出發的時陣,天是暗眠摸,一點仔光都無……!阮一直綴頭前的人的跤步,一步一步行,無人講話,只賰跤步聲!天色漸漸光矣,當阮看著玉山頂的時陣,閣有一段艱苦的路愛行!路順山壁,真正有夠崎,阮只會使跤手並用,才有法度向上行。經過千辛萬苦,阮十幾个人,總算是足百到玉山頂矣!小小的一塊空地,這就是臺灣上懸的所在,向四周圍看過去,攏無阻礙,會使看到足遠足遠的所在……!天微微仔光,日頭咧欲出來矣!這个時陣,對玉山看出去,有一大片的雲海,全部攏是雲,就親像海波浪按呢咧滾絞!看著這種我從來毋捌看過的情境,有一目nih的時間,我真正想欲按呢跳落去,跳落去倒佇雲海,享受佇雲海頂的感覺……!日頭是用跳的,「bong5」一下,就跳出雲海,向逐家相借問,講gau5早!這一幕,我應該一生攏袂去予放袂記,因為,這是我心目中,臺灣上媠的風景!

 
  臺灣,閣有滿滿的人情味!會記得細漢的時,若去阿公阿媽兜,暗時仔食飯飽,厝邊頭尾攏會行去廟埕,將椅條仔排兩逝,坐予定,講東講西講天下。一下仔是講三叔公仔欲娶新婦,一下仔是四嬸婆欲抱雙孫,阮遮囡仔人,就四界走傱覕相揣。有一寡人咧練歌仔戲,一寡人咧唱歌……這種的和諧佮人情味,是我感受會著的,人間上媠的風景!

  毋管政治按怎變換,有一項是自古到今攏無改變的,彼就是咱遮樸實、骨力、拍拚的老百姓!臺灣因為有逐家的努力,才會使遮爾繁華!

  臺灣有上好的景緻,上感心的人情味。咱生活佇臺灣,真正是足幸福的。用好穿好社會福利好,有通蹛,閣有通食,公共設施有咧做,逐家出入攏有車,咱的生活利便閣四序,臺灣是真正好!

寶島風景上氣派,綠水青山媠安排;
人情味是足豐沛,臺灣確實好 所 在!
我的演講就到遮結束。

 

*全文刊於《海翁台語文學雜誌》第170期

大觀園:詩歌精選:囡仔詩 

蠓仔

吳珍勝

蠓仔真正無講理,

不時綴佇我身邊,

定定趁我無注意,

哎唷! 共我叮落去

害我癢甲抓袂離!

 

*全文刊於《海翁台語文學雜誌》第163期

大觀園:詩歌精選:囡仔詩 

柑仔

大竹國小/詹茗宗

指導老師/謝金色


阿公真拍拚

柑仔種甲規山坪

品質好 好名聲

逐家攏知影

柑仔圓 柑仔甜

我佮小妹食甲笑微微

 

*全文刊於《海翁台語文學雜誌》第163期

大觀園:散文隨筆 

勤儉較有底,浪費無成家

黃靜惠

  細漢的時陣,阮這做人小弟小妹的人,攏愛抾阿兄、阿姊抑是別人的衫仔褲來穿。無細膩,若予阿母看著阮無歡喜的表情,伊就會笑笑仔共阮講:「勤儉較有底,浪費無成家。」

  儉慣勢了後,等我大漢開始上班,第一擺領著薪水,嘛毋甘買新衫來穿,猶是穿阿姊in的舊衫去上班。阿母看著可能心內替我感覺毋值,問我:「你一直穿人的舊衫,心肝頭敢攏袂艱苦喔?」我煞戇戇仔共應講:「袂啊,按呢較環保啊。你毋是定定咧講,勤儉較有底,浪費無成家。」

  阿母聽我按呢講,煞歹勢一下,笑講:「彼是往過,我佮恁老爸,薪水有限,閣愛飼恁一大陣囡仔,毋才按呢講。這馬無仝款矣,你會曉家己趁錢,會使買寡媠衫來穿,毋免閣穿人的舊衫矣啦!」

  這斗,換我替阿母咧毋甘心酸。阿母嘛足少替家己買衫,伊規衫仔櫥的衫,凊彩一領提出來攏有一、二十年的歷史。彼年,我趁母親節,買一軀新衫送伊,伊足歡喜,毋過嘛是踅踅唸,叫我莫遮討債。我就刁意故共弄:「你免煩惱啦!我知,勤儉較有底,浪費無成家嘛。」阿母那笑那講:「謼,你這个囡仔乎,當時學甲遮爾仔無大無細!」閣順紲伸手偷偷仔共我的尻川䫌捻一下,喔,足疼的呢!阿母的手頭實在有夠重的。

  講正經的,除非咱有一个尻川鬥柄好額的老爸,若無,開錢猶是愛量其約,量入為出,儉儉仔開,較實在。千萬毋通共錢捎來烏白亂亂開,若無,三代粒積一代虧空,古早人講「好額袂過三代」,毋是無道理的。

  現此時,銀行辦金融卡攏真便利,萬一你若染著用債養債的消費慣勢,開錢若開水,就親像坐著討債破產的直達快車,真正是會趁錢龜足百壁,了錢水崩山,落尾就應著這句話「一代舐鹽搵醋,儉腸凹肚;二代長衫綢褲拖塗,看錢若塗;三代當田賣租,當囝賣某;四代公媽香爐,匼佇街仔路。」尾手散甲有路無厝,戶口枋仔,只好吊佇電火柱。

  零星抾,較袂散,佇儉錢儉猶未夠進前,咱著愛佇逐工一杯咖啡,抑是買一支新的智慧型的手機仔之間,做一个巧巧人的選擇。若無,人兩跤,錢四跤,無論咱按怎骨力逐,攏逐無。

  我真感謝阿母對我的管教,結婚了後,我就學伊寬寬仔,零星抾,加圇項,阮翁仔某兩人一人擔一擔,嘛沓沓仔共這个家疊成山囉。

 

*全文刊於《海翁台語文學雜誌》第162期

大觀園:詩歌精選:囡仔詩 

節日

新港國小 李宗燦

指導老師徐禎偵

 

今仔日是啥物節日

阿爸佮阿母會笑微微

阿爸送予阿母花一蕊

阿母送予伊卡片

我問in為啥物

阿爸講

今仔日是阮結婚的紀念日

 

*全文刊於《海翁台語文學雜誌》第162期

大觀園:詩歌精選:囡仔詩 

田蛤仔

田美瑜

田蛤仔是啥代誌?
予恁氣甲來抗議!
原來喙焦欲啉水,
一兩三四五六七,
九隻鬥陣來揣水!
珍惜用水莫浪費,
祈求天公落雨水,
予恁安心轉去覕!

 

*全文刊於《海翁台語文學雜誌》第162期

大觀園:詩歌精選:囡仔詩 

鉛筆

張威龍

是啥人講阮烏心肝

 袂彎彎曲曲的身軀

是我一生正直

無言的解說

毋過

阮袂來共你懇求請你用溫柔的雙手

予阮為你寫出

一世人的歡喜佮憂愁

阮的人生

就袂烏趖趖

就會有一條

七彩的虹(khīng)

 

*全文刊於《海翁台語文學雜誌》第157期

頁數:  1 2 3 4 5 6 7 8 9 10
意見反應信箱:service@king-an.com.tw
Copyright © 2012 真平企業有限公司 版權所有.禁止擅自轉貼