大觀園:詩歌精選:現代詩 

相思

張威龍

佇闊茫茫的人間
日子過了茫茫渺渺
是按怎日日夜夜
干焦想你一人
愛意綿綿
情絲長長
害阮心酸跤軟

日落西山
月出東爿
日子躼躼長
倒佇冷冷的眠床
戇戇仔等天光

啥人講
船過水無痕

相思
親像海波浪
一陣一陣閣一陣
無暝無日折磨阮

 

*全文刊於《海翁台語文學雜誌》第166期

大觀園:詩歌精選:囡仔詩 

老師

仙吉國小郭芩萱 

指導老師:黃基博

 

老師親像奶母,
予阮食伊的奶水,
漸漸大漢。
奶水就是智識、學問。
囡仔無乖,
走來走去,
予奶母頭殼疼,
囡仔若乖真聽話,
奶母就笑微微,
教阮唱歌,
講古予阮聽。


*全文刊於《海翁台語文學雜誌》第165期

大觀園:俗諺 

六月火燒埔,七月無焦塗 

阿緱囡仔

      人講:「六月火燒埔,七月無焦塗。」
這陣雨相連紲已經超過兩禮拜,目前嘛過了七月半,古早人的智慧果然不同凡響!不過,這只是經驗的累積。
      也就是講,毋管是智慧抑是智識,總是對錯誤當中整理出來的正確的經驗,經過有系統的整理,就是一般所講的科學。
      讀冊彼陣有修過「氣象學」。當時,教授講氣象預報,有相當的成份嘛是依賴著民間俗諺。
      這句:「六月火燒埔,七月無焦塗。」就是一句重要的俗諺。
      七月半過了後,時序已經進入秋天,雖然已經有淡薄仔涼冷,不過這只是雨落久所造成的氣溫降低,相信當雨停的時陣,猶原會回復火燒埔的天氣。

 


      這閣有一句氣象名詞,叫做『秋老虎』。彼種天氣,透早加穿一領,到中晝凡勢愛加褪一領,到尾暗秋風涼冷嘛閣會流汗,是一个歹穿衫的天氣,甚至閣會起風颱。
      中秋風颱暝相信蓋濟人有經驗,嫦娥對月宮看人間做風颱,彼是啥情景啊?現代科技的『追風計畫』應該會當了解才著!
      今仔日透早出炎日,滿天無雲清朗朗,啥知八點外,雷電閃爍,雷聲乒乓吼,大雨若倒水,不只無焦塗,閣強欲做水災。
      在庄跤有時雷聲閃電過落大雨,老大人攏會講:「西北雨落袂過田岸路!」果然無錯,庄頭雨水淋灕,大細漢粟仔耙袂離,庄尾稻埕卻是焦離離。
      現在科技進步,飛機會當飛入風颱中心去觀察,人造衛星會當佇太空翕相,加上氣象嚴重變遷,氣象俗諺愈來愈失去參考的價值。
      將來凡勢變成是神話傳說而已,時代咧變,人心咧變,人講人無天理,天就無照甲子,敢真正是按呢?這已經是超越科學,但是猶閣使人煩惱的代誌啦。

 

*全文刊於《海翁台語文學雜誌》第167期

大觀園:詩歌精選:現代詩 

圳仔水恬恬仔流──紀念八田與一先生

黃勁連

 

日也流,暝也流
水庫的水
恬恬仔流
若蜘蛛網咧
對烏山頭
流來嘉南平原
每一个鄉鎮、庄頭
流過土地的肌膚、細胞
來到阮庄頭的圳溝

日也流,暝也流
圳仔水恬恬仔流
流過鐵枝路邊
發林投的水溝

日也流,暝也流
田水淹淹仔流
流來田尾
流來田頭
問咱的土地
敢食中晝

 

*全文刊於《海翁台語文學雜誌》第121期

大觀園:散文隨筆 

手機仔

蔡連真

      現代人是眞趣味,出門就愛紮家私,紮啥物?當然嘛是紮手機仔,時代進步的速度實在眞緊,手機仔煞成做現代人咧接接代誌所需要的物件,無論是大人甚至是囡仔,是時時刻刻範勢攏用會著--的,嘛因為科技進步了傷緊,隨時都有新的產品來上市,所以講:手機仔的市場為著欲搝人客,嘛是用盡食奶仔力競爭甲齣頭一大堆。
      彼工阿國仔in阿公不幸來過身,規厝內的人攏哭甲眞毋甘,in阿爸驚in阿公無聊,欲做司公進前,就去共糊大厝的師傅講:是毋是會當加糊一支手機仔,通燒予in 阿公使用,彼个師傅想講:有生理就愛加做一寡,就共阿國仔in老爸講:會使得—啊,毋過;干焦糊一支手機仔驚會眞歹用,阿國in老爸就應講:「是按怎」會歹用?
      彼个師傅講:若有心欲做有孝囝,就愛做全套--的,較袂到時歹用加氣死一擺,伊就講:地府比較較溼,愛加糊一个手機套仔套咧,而且老歲仔人耳空較重,嘛愛糊一个耳機仔予掛咧較袂聽袂清楚,阿國仔in老爸想講:既然大條錢都開--矣,也毋免儉這細條--的,答應師傅了後,越頭就欲走。
      想袂到這師傅拄著好人客攏袂出價,就閣講:人客啊!地府攏陰森森電力應該是無夠,我看嘛愛閣加糊一个充電器予伊使用,較袂到時定來共你講手機仔無電敲袂通?阿國仔in老爸心內想講開遐濟--矣,嘛無差這上尾一項,就答應彼師傅,欲閣糊一个充電器。
      這个時陣師傅想講這途--的做遐久,嘛眞少拄著這款的好人客,煮熟的鴨仔欲哪會使遐簡單就閣予伊飛去,夾到喙的肉若閣落落去就眞拍損--矣,就閣開喙講:人客啊!咱人佇日常生活欲匯款抑是劃撥寄錢嘛愛眞了精神去處理,俗語講:「錢銀三不便」,咱陽間猶有預付卡通好用,陰間是眞無方便,你是毋是愛閣加糊淡薄仔紙的預付卡通好予伊使用,較袂定定佇夢中來共你討東討西。
      阿國仔in老爸實在忍甲擋袂牢--矣,就共糊大厝的師傅講:師傅啊!你的服務遐爾仔周至,實在眞正足感心--的,麻煩我若欲來提物件的時陣;你愛加附幾張仔名片予--我,師傅應講:好啊!好啊!我宛若有咧做售後的服務,你一定欲共我鬥紹介人客hooh!阿國仔in老爸應講:共你交關遐濟,煞毋免共你的名片燒幾張仔落去地府,請阮老爸手機仔若用了有啥物問題,愛敲電話予你,請你落去地府做服務!

 

*全文刊於《海翁台語文學雜誌》第155期

大觀園:詩歌精選:現代詩 

異鄉的白翎鷥

黃靜惠

 

飛過基隆的山崙
白色的孤影 歇佇田寮河邊的樹椏頂
邊仔 人來客去的廟口夜市
只有加添伊飄零的 心思

港口的鴟鴞 一隻 兩隻
一輾閣一輾 踅來閣踅去
哪知影日落黃昏 異鄉鳥隻的稀微

他鄉的 日頭落海
故鄉的 日頭落山
重重疊疊 形影相交纏
予伊一時分袂清
吹過來的 是山風
抑是海風

 

*全文刊於《海翁台語文學雜誌》第153期

大觀園:演講稿 

學閩南語真心適

指導老師:陳淑和
演講者:僑德國小陳柏安

      各位評判老師,各位同學,逐家好! 我是編號第( )號,今仔日我欲演講的題目是:「學閩南語真心適」。
      若講著咱閩南語.實在雅氣,會使講現代的代誌,嘛會使傳古早的道理;會當唱山歌,嘛會使唸歌詩。老大人講起「古早古早當初時」,有鬥句、閣會牽絲,聽了心適、有古味。中年人交際、盤撋做生理,若講仝款的話語,會當你兄、我弟。青春少年家,若是講閩南語,愛人仔歡喜甲欲死,講你有情閣有義,無背祖就袂姻緣離。三歲囡仔兄,七歲囡仔姊,講閩南語臭奶(ni)味,阿公、阿媽聽了真歡喜,喙仔笑微微,你講是抑毋是?
      我第一擺接觸閩南語,是佇我細漢時,真歹睏癖,阿爸就會駛車載我和阿母 四界去踅玲瑯,佇車內,阿母就會唱:「嬰仔嬰嬰睏,一暝大一寸;嬰仔嬰嬰惜,一暝大一尺……」。我就佇遮爾幸福、溫柔的歌聲中安心仔睏去。
      讀冊了後,上閩南語課輕鬆閣趣味,一面𨑨迌一面講閩南語,一聲「𠢕早」、「食飽未?」,老師講:透早起床 就愛共阿公講一聲「𠢕早」,阿公聽著歡喜甲喙仔裂獅獅。共厝邊隔壁阿伯、阿姆問一句:「食飽未?」,in攏講我真乖、真好禮。用閩南語來請安、相借問,會當予咱逐家的感情攏連做伙。
      閩南語有八聲七調,講出來懸懸低低,聽起來媠閣自然;閩南語是上蓋斯文的言語,予我愈學愈佮意。佇學校阮若拄著代誌袂順勢,老師就講一句「拍斷手骨顛倒勇」這是咧共阮鼓勵;若是讀冊無認真,大人就會講「少年袂曉想,食老就毋成樣」;若是逐家傷吵,老師就會講:無~恁是咧「墓仔埔放炮,吵死人」;若是日子想欲較清閒,有這句「時到時擔當,無米才來煮番薯湯」的氣魄,生活,自然就輕鬆仔過。老師上課嘛有定定咧講:古早俗語是古早樣,台灣文化毋通斷,母語一定愛予伊代代來生湠。
      台灣是咱的土地,芋仔、番薯愛合齊,語言袂使無公平,台灣母語著愛挽回,媽孫仔若無法度對話,鴨仔聽雷就會出問題;祖先的智慧無地比,閩南語,咱就緊共伊來學起,學閩南語真正心適、真正有意義,俗語講「捷做手袂鈍,捷講喙就順」。希望逐家攏用閩南語來盤撋。我的演講到遮結束,多謝逐家。

【本文曾獲104年潮州視導區閩南語演說比賽第一名】

 

*全文刊於《海翁台語文學雜誌》第166期

大觀園:詩歌精選:現代詩 

一蕊花

詩文/攝影  張威龍

 

一蕊花開
愛用偌濟的性命來看顧
一蕊花謝
愛用偌濟的青春來怨嘆
一生的愛
愛用偌濟的時間來等待

毋管花開
抑是花謝
日子總是一工一工過
日落西山
月出東爿
等待的無奈
佇阮的心肝內滾攪
親像海波浪
一波未平
一波又起


阮的青春
親像一蕊花
有啥人來共阮
好好仔看顧

 

*全文刊於《海翁台語文學雜誌》第152期

大觀園:詩歌精選:現代詩 

母語坐飛機

美紅

我 佇台灣出世
我 食台灣奶水
我 蹛台灣捌字
我講袂出 阿母的話語

真熟似的四周圍
真平凡的代誌
真趣味的俗語
攏有咱祖先的智慧

細漢讀冊 學華語
大漢出國 A B C
放捒母語 坐飛機
飛對遠遠四界去

上媠的土地 毋通失落台語
無論追求未來 抑是走揣過去
文學 做地基
欲講欲寫 有音嘛有字

 

*全文刊於《海翁台語文學雜誌》第151期

大觀園:詩歌精選:現代詩 

寫予細漢查某囝的心內話

林貴龍


今仔日你已經兩歲
猶毋捌聽你開喙講話
心內憂心
你敢會一世人攏按呢!


今仔日你過三歲
頭一擺聽你叫老爸
無限歡喜
流著目屎謝天謝地!


今仔日接著恁老師的電話
講你佇學校佮人冤家勞債
家己反省
是毋是阿爸的關心無夠濟!


今仔日參加你的美展畢業典禮
看你當選全校冠軍的圖畫
心內安慰
你有比我較𠢕的才藝


今仔日你佮男朋友吵家抐宅
看你定定使性地
阿爸擔心
你將來是欲按怎扞家!


1.扞家:音huānn-ke,持家

 

*全文刊於《海翁台語文學雜誌》第172期

頁數:  1 2 3 4 5 6 7 8 9 10
意見反應信箱:service@king-an.com.tw
Copyright © 2012 真平企業有限公司 版權所有.禁止擅自轉貼