大觀園:詩歌精選:現代詩 

聖山風情

林貴龍

玉山的頭形真正媠        
長長的頭毛披佇雙爿的肩胛邊
頭毛頂的玉光閃閃爍爍
身懸三千九百五十二
徛佇國際的懸度佮世界比 
參日月同輝
風來雲去
雲開雨止
擔頭挺身數百萬年
玉山的雙手展開開
左右牽一百三十三个兄弟
南北連手長萬里
逐年風颱幾號催
算袂清地動走山有幾期
尻川相楗無代誌 
閣是一年的春天
玉山的體材真標致
落雪的山景猶原是翠青
骨骼全是松柏樟楠hi-noo-khih
規陣的神木四千年
腹內一百二十九條動脈
環結四海川流綿綿
櫻花鮭山椒魚
呵咾甲觸舌
自由好空氣

 

*全文刊於《海翁台語文學雜誌》第169期

大觀園:散文隨筆 

壁櫥的薰吹

蔡連眞

      自沓沓仔捌代誌以來,心肝內就有一个疑問?千想萬想都想袂出答案,猶閣毋願去問阿爸抑是阿母,攏感覺若有耐心,無論三年抑是五冬總有一工,我一定會共原因揣出來,嘛共天公伯仔拜託講:佇我猶未揣著眞正情形進前,毋通予人來共我講彼因由是啥物?
       彼支薰吹,三不五時阿爸就會攑起來拭拭咧,甚至閣會用喙去共頭仔尾的喙空歕歕咧,閣驚喙瀾卡佇頂頭,就閣十拭八拭,袂輸咧顧古董仝款,其實;彼支薰吹是已經舊矣,阿爸捌講起伊外型的色水,對本底的牛奶色已經變甲像薄薄的茶米色矣,尤其是尻川底彼夾薰的喙空,已經是變咖啡色--的囉,甚至看起來猶有淡薄仔烏色烏色。
      上奇怪--的是阿母,阿爸定講物件若過伊的手,就免閣想欲揣有,伊的個性就是愛清氣,厝內上無愛囤東囤西,是按怎壁櫥內這支薰吹,阿母無共伊phiann擲sak?眞正是親像布袋戲咧講的口白「其中必有緣故啦」,我為著欲家己來查出這支薰吹神祕的所在,也袂當無來閣較mî-tsinn咧,雖然毋免做甲綿死綿爛,毋過;工課欲做嘛是愛骨力做。
      我想講:阮兜攏無人會食薰,就共目標囥佇阿爸每年兩擺佮阿姑、阿伯in咧食兄弟仔桌,來利用逐家做伙咧食飯、開講、泡茶的時陣,斟酌看啥會食薰、啥有薰癮、啥有彼種食薰的動作,雖然彼是佇室內人濟的所在袂使食薰,毋過;若咧癮是宛若會比手畫刀來過焦癮--的,這也就是我愛詳細觀察的所在,一絲釐仔就袂使來失覺察,才袂雙頭無一ngauh,好料--的食無閣做戇工。
      啥知影,費盡食奶仔力嘛是無彩工,根本阮對阿爸這代起,所有遮公族仔就無人會食薰,我就是按怎查嘛查袂出啥物齣頭來,想講若欲知影結果是按怎,規氣就莫閣查--矣,去問阿爸抑是阿母較緊啦,較袂捎無寮仔門規工亂亂傱,予人笑講:囡仔人就數想欲做偵探。
      佳哉?天公眞正是疼戇人,無來辜負我這个有心追查的人,當當我咧躊躇是毋是愛放棄的時陣,無意中看著阿爸咧清伊的事務屜仔,彼有一本眞舊閣已經退色破皮的相簿,我就共相簿提起來看覓,哇!
      結果走出來--矣,眞相予我揣著--矣,這陣已經明白矣,原來壁櫥內的彼支薰吹,是阮阿公留落來的紀念物啦。

 

*全文刊於《海翁台語文學雜誌》第165期

大觀園:詩歌精選:囡仔詩 

貓仔展功夫

龔乾權

 

 貓仔枵甲瘦卑巴

 那行那叫 喵─喵─喵─

 行到花園 

 恬恬覕佇燈仔花跤

 毋知伊咧等待啥物

 厝角鳥仔雄雄歇落來

 貓仔親像爍爁 

 跳起來 演一齣真媠氣的空中接殺

 

 

*全文刊於《海翁台語文學雜誌》第168期

大觀園:詩歌精選:現代詩 

黃色記持~阿勃勒 

程鉄翼

 圖片 作者提供

雲清,日頭,豔
藍藍的天
掖出南國初夏的熱情

阿勃勒黃色的記持
𤆬著風姨
予府城的街仔路
流著金黃的湯汁,吸引
來來去去過路的跤步
黃錦錦,甜甜閣蜜蜜
加溫戀人的MELOLI

佇紅磚仔樓邊
湠開黃金雨絲
搖搖幌幌
一陣閣一陣,阮的心
是囥佇無邊曠闊平洋的船

校園的鐘仔聲,拍開恬靜
一絲閣一絲的痴情
將下晡燒滾的南國
鋪出一幅琉璃世界
叫醒過晝無神的靈魂
2014.05.28 寫佇府城南濱

 

阿勃勒:

      夏季開金黃色花,腋生,黃色,數目葚多,排列呈總狀花序,花序成串下垂很漂亮。因花瓣掉落時,隨風紛飛,如細雨般飄落,所以它的英文名字就叫作「黃金雨」(Golden Shower Tree) 。花落後結出長圓筒形不開裂莢果,莢果顏色由綠轉黑褐,成熟需時一年,常見今年的花與去年的果並存樹上,每室有一種子,呈扁圓形有褐色光澤,果肉是瀝青狀黑色黏質有異味,種子味甜可食。

 

 *全文刊於《海翁台語文學雜誌》第152期

大觀園:演講稿 

佮朋友分享的快樂

張淑柑

各位評判老師、各位同學,逐家好。

我是第七號,今仔日我欲演講的題目是--佮朋友分享的快樂。

      一个人的一生,講長無長,講短無短,佇咧人生的路途若加減有朋友來做伴,就親像阿母咧煮食,有時甜有時鹹,物件食了才有滋味,人生,有朋友分享,才會增加淡薄仔無仝款的味素,有當時仔閣會當互相落氣求進步,無的確閣會親像青盲雞啄著米,得著料想袂到的好處。曷那講著佮朋友分享啥物代誌會快樂,當然就是講「耍陣頭」的心適代,三不五時,若聽朋友講心事,共鬱卒消敨一下,彼種互相安慰的情誼,袂輸咧食檨仔青,酸甘甜仔酸甘甜,予人偌數念咧!

      可能有真濟人會想講耍陣頭的一定攏是歹囡仔,因為一寡愛𨑨迌、展鱸鰻、歹甲有賰的少年家才會去耍陣頭,好哩佳哉,我這个死忠兼換帖的,佮我有仝款的看法,知影陣頭是咱台灣足珍貴的文化,需要好好仔保存佮傳承,才會當留予後代囝孫一个完整的表演藝術。

      從讀高中開始,我逐禮拜攏去學歕鼓吹,這款訓練毋但予我學著一項樂器,嘛教我做代誌愛有耐心,予我知影專精一藝可收成的道理,更加予我了解著祖先的智慧有偌好。逐改若佇學校和同學分享的時陣,阮兩个攏嘛笑甲喙仔裂獅獅,佮朋友分享陣頭予阮「日日好心情,學習才會成」,閣會當共阮規工的疲勞攏消敨,真正是「一兼二顧,摸蜊仔兼洗褲」。

      會記得頭一改食薰,去予阿爸罵甲窮欲臭頭,連阿母都無好面腔,我氣甲無食暗頓就覕佇房間。佳哉死忠的敲電話來,共我講:「食薰了錢,空氣汙染,人人討厭,較嚴重的中肺癌,做化療偌艱苦偌疼你敢知。」聽朋友解說,我才知影阿爸是刀仔喙,豆腐心,抱著人愛教示,牛愛鑽鼻的愛咧疼我,向望我大漢成人,嘛佮朋友講好欲做毋食薰啉酒的新少年家,這是佮朋友分享得著的快樂。

      佮朋友分享「耍陣頭」,予我的高中生活有鹹酸苦澀的滋味,嘛予我知影路無行袂到,事無做袂成的道理。當然,佮朋友分享心事閣較讚,毋但輕鬆快樂,歡喜過日子,閣會當規家和樂,真正是一件有夠讚的代誌。

我的演講講到遮,感謝逐家來共聽,勞力!

 

*全文刊於《海翁台語文學雜誌》第171期

大觀園:詩歌精選:現代詩 

【現代詩】之2 失落的鹽埕

許正勳

祖傳鹽耙仔收起來囥
水車破糊糊
無人問
鹽堆溶溶--去
五分仔車
駛入鹽博物館的浮雕
海風吐大氣
白翎鷥揣無伴

曲痀老鹽工
黃昏的形影
哭賴
變種的七股鹽山

(註)
1. 水車(tsuí-tshia):龍骨車。昔日農家灌溉田地用腳踩的引水裝置,鹽民
也使用「水車」取水。
2. 五分仔車(gōo-hun-á-tshia):(運鹽或載運原料甘蔗)小火車。
3. 哭賴(khàu-luā):無奈哭訴;哭著賴人。

 

*全文刊於《海翁台語文學雜誌》第168期

大觀園:散文隨筆 

荔枝乾(nāi-tsi-kuann)

廖淑鳳

      這是荔枝乾,是90歲 ê「葉張鏡」阿媽親手曝--ê,伊是一位勇健 koh 樂觀 ê 阿媽。阿媽真敖力煮食,豉鹹淡(sīnn kiâm-tānn),通人呵咾伊有好手藝。
      日時頭囝兒新婦,孫仔攏去上班讀冊,伊就來樂齡中心,算是樂齡中心 ê 模範生,伊上大 ê 趣味就是對潭子坐公車,去到台中車頭邊 ê「建國市仔」踅街(se̍h-ke)採買,買 kah 規菜車仔 tīnn-tīnn-tīnn。
      我 bat 替伊煩惱,物件重 huâinn-huâinn,欲按怎坐公車?伊笑 kah 目睭攏 bui--去,講司機先生抑是坐車 ê 人客 lóng 真有禮貌,好服務,予人真呵咾,起車落車攏有人替伊服務....感謝台灣 ê 人情味,予跤健手健 ê 阿媽生活了足有元氣,毋知啥物緣故,看著伊,我會感覺特別親切,我若咧上課,伊攏目睭展大大蕊,掠我金金相,我捌好奇問--伊:「阿媽,你咧看啥物?」伊講:「你是毋是攏無食飯?哪會佮舊年彼个無成?」

      「舊年彼个是我,近年這个 mā 是我,我攏有乖乖食飯,是你心情較少年,看我較幼齒 lah!」
講笑罔講笑,其實是因為伊細漢欠栽培,致使文字毋捌--伊,如今會當讀冊,伊特別專心聽老師咧講啥物,毋敢落勾(làu-kau)老師 ê 一舉一動,毋過,另外一位老師毋知,有淡薄仔無歡喜 kā 講:「你是按怎掠我金金看?」
      我問--伊,你按怎 kā 應。
      阿媽講,伊無客氣共唱--轉去,講:「恁做老師--的,就是欲予人看--ê,敢袂使看--得?幾歲--矣!有人欲 kā 你看,愛偷笑!」哇!老薑母有影薟。
      伊予我荔枝 ê 品種是蛀核仔(tsiù-hu̍t-á), mā 有人講「至微仔(tsì-bî-á)」,氣味芳甜,khiū 度有夠,無輸龍眼乾肉, 而且,內底充滿阿媽 ê 疼惜佮感情,食落喉了後,規喙 ê 芳甜,芳入到心肝穎(ínn)。

 

*全文刊於《海翁台語文學雜誌》第171期

大觀園:詩歌精選:囡仔詩 

《囡仔詩》之3   蜜  蜂

黃金汾

蜂啊蜂 愛做工                   

飛來飛去 揣花欉               

石榴1花 紅紅紅                       

龍眼花 芳芳芳                   

 

蜂啊蜂 愛做工                   

飛來飛去 揣花欉               

花蕊濟濟 伊無嫌

採花做蜜 甜甜芳芳

 

(註)

1. 石榴(siãh-liû):植物名,夏初開紅花,子多,可食用。也寫做「榭(siā)榴」。

 

*全文刊於《海翁台語文學雜誌》第158期

大觀園:散文隨筆 

阿母的新朋友

陳潔民

搬來花壇已經超過年半,阿母定定攏是一个人。除了隔壁雅鐘老師的阿母以外,較定定來的,閣有一个賣青菜的阿婆,會拍一下仔招呼,閣有隔壁幾戶的家庭主婦,毋過in大部份的時間攏咧無閒tshua7囡仔,除了按呢,伊就無啥物人通講知己話矣!

最近阿母佮庄仔頭附近的老歲仔人做朋友,逐工攏真歡喜,我若下班,伊就對我講起伊的新朋友,怹的年紀,攏是七、八十歲以上的人矣!和伊的年紀差不多頂下歲,真有話通講。

前一站仔,伊提冬瓜醬轉來;前幾工,伊提醃瓠仔轉來;伊講攏是伊的朋友送的。

伊前一站仔感冒,無啥出門,最近兩、三工精神好一屑仔,若有日頭,伊就去庄仔內四箍輾轉散步,去揣伊的朋友開講,看會出來,伊的心情加真快活。

今仔日,伊閣提幾條菜瓜布轉來,講是伊的朋友家己厝內的菜瓜曝焦的菜瓜布,用來洗碗加較好,我講好喔,菜瓜布真好喔!閣提轉來一袋油菜,伊已經揀好矣,我將油菜炒好做暗頓的配菜,伊食甲真歡喜,講油菜真清甜利口。

阿母講:「定定提人的禮物真歹勢,做人愛有來有去,咱厝內家己做的環保酵素,會當予我提去送予朋友無?」

我講:「當然會使得,只是傷重,你應該捾袂振動。等候假日的時陣,我陪你去散步,才陪你去朋友in兜,替你提環保酵素予伊好無?」

伊聽了真滿意,歡喜入眠。

我講:「阿母,暗安。」

伊講:「暗安。」

感謝佛菩薩,予阿母會當習慣佇遮綴我蹛的生活,離開伊較早生活幾十冬的環境,和厝邊隔壁分開,總是會感覺較稀微,這馬看著伊交著新朋友,我感覺真替伊歡喜,希望伊會當快樂過每一日。

 

*全文刊於《海翁台語文學雜誌》第158期

大觀園:詩歌精選:現代詩 

尾指

王崇憲

小手,牽著阿爸的尾指
行佇
記持中的
長長街路

袂記得有幾年矣?
若親像毋捌
毋捌閣
牽過阿爸的手矣

這馬,
阿爸的手
看著煞全全攏皺紋
我咧想
毋知啥物時陣
我才敢
才敢閣再
牽伊的尾指?

 

*全文刊於《海翁台語文學雜誌》第158期

頁數:  1 2 3 4 5 6 7 8 9 10
意見反應信箱:service@king-an.com.tw
Copyright © 2012 真平企業有限公司 版權所有.禁止擅自轉貼