大觀園:先賢經典 

三字經

黃勁連

曰火水

木金土

此五行

本乎數

十干者

甲至癸

十二支

子至亥

 

台譯:

儂咧講水、火、木、金、土,這着是五行,代表五種無肖仝兮性能,包羅天地萬物變化兮現象。即五个順序,是根據數目來兮。猶閣有仁、義、禮、智、信五種人際關係,不可改變兮法則,是袂使得濫糝兮。

 

宗旨:

以上八句,列舉水、火、木、金、土五行佮仁、義、禮、智、信五常,教儂「五」兮數字概念。

三字經--台語本

大觀園:先賢經典 

指南車

黃勁連

黃帝時代,南方有一个真猛兮民族,兮頭目蚩尤時常興兵做亂。

有一年蚩尤閣帶兵侵略中原,黃帝誠受氣,着發兵攻打蚩尤。

兩爿兮軍隊佇涿鹿展開一場生死大決戰;蚩尤兮軍隊強閣猛,閣因為罩霧兮關係,一片白茫茫,分袂清東西南北,黃帝兮軍隊互蚩尤兮軍隊團團圍住,情形真危險。

即个時陣,黃帝真巧,伊臨時想出一個辦法,着是發明「指南車」。軍隊佇白霧中肖戰,「指南車」真清楚指出東西南北四个方位,互蚩尤無帶走閃。因為安爾,伊則將蚩尤拍敗。

三字經--台語本

大觀園:先賢經典 

三字經

黃勁連

曰春夏
曰秋冬
此四時
運不窮
曰南北
曰西東
此四方
應乎中

台譯:

儂咧講兮春、夏、秋、冬,這着是「四季」,四季一直無停咧運轉。儂講兮東、西、南、北,這着是四方,這四个方向對應中央,以中央做標準。

 

宗旨:

以上八句,舉春、夏、秋、冬四季,佮東、西、南、北四个方位,教儂「四」兮數字觀念。

三字經--台語本

大觀園:先賢經典 

宇宙兮形成

黃勁連

聽講古早古早,天佮地是合做伙兮;無日頭、月娘、星,亦看無各種動物、植物。

即个時陣,出現一个名叫做盤古兮儂,伊生佇天佮地之間,着是咱現在所講兮「頂天立地」。後來,天每天懸一丈,地綴咧厚一丈,盤古兮身軀亦每一工懸一丈。經過一萬八千年,天變甲真懸,地亦變甲真厚,可憐開天兮盤古卻是疲勞厭

;最後伊兮頭變做山嶽,伊兮目屎變溪流,喘氣變做風,聲音變做雷,頭毛變做草木,目珠變成日月,伊兮血流來流去,變成大海,安爾即个宇宙形成啦。

三字經--台語本

大觀園:先賢經典 

三字經

黃勁連

三才者
天地人
三光者
日月星
三綱者
君臣義
父子親
夫婦順

 

台譯:

咱一般指三款有才情兮物件,是指天、地、人。三種會發光兮物件,指日、月、星。咱所講兮三種儂參儂相處鬥陣兮綱常是:君、臣互相愛遵守義理,父仔囝相親相愛,翁仔某和和氣氣,毋通吵家鬧宅。

 

宗旨:

以上八句,舉例天、地、人;日、月、星以及君臣、父子、夫婦參「三」有關兮物件佮倫常關係,明示「三」兮數字概念。

三字經--台語本

大觀園:先賢經典 

孝心感動天

黃勁連

舜是上古時代仁德兮天子,細漢兮時,生活誠困苦。

舜有一位偏心的後母佮一个歹心肝兮小弟叫做象。後母虐待伊,象閣欺負伊;幾何擺想辦法卜共伊害乎死,但是攏無成功。

帝堯知影伊是一位會倚靠兮古意儂,着共伊叫去朝廷做官,後來看伊做代誌認真,感心閣將帝位讓互伊。

舜登基做皇帝了後,無參後母佮小弟計較,猶原參以前共款,有孝父母,友愛小弟,閣封象做諸侯。象受着兄哥舜兮感化,從此改過自新,努力拍拚,成做一位有用兮儂。

大舜兮孝心感動天,得着逐家兮敬仰;而且伊有孝兮事跡流傳千古,成做後世孝悌兮模範。

三字經--台語本

大觀園:先賢經典 

三字經

黃勁連

首孝弟
次見聞
知某數
識某文
一而十
十而百
百而千
千而萬

台譯:

做儂上基本兮,是有孝父母,敬愛兄弟姊妹;其次,則是擴充見聞,增加智識,親像認捌一寡數目字,佮某種文字,像一、十、百、千、萬。

 

宗旨:

以上八句,提示受教育兮儂,應當重視倫理,則來增加智識,認識文字、數字。

三字經--台語本

大觀園:先賢經典 

有孝兮皇帝

黃勁連

劉邦消滅西楚霸王項羽,建國號「漢」,伊着是漢朝兮開國皇帝--漢高祖。自做囡仔時代,伊着真有孝,當伊做皇帝了後,伊猶原無變,每一工去向in老父請安問好。

有一工,一个僮僕走來共太公講:「皇上雖然是汝兮後生,但是目前伊毋是普通兮身軀啦,伊是天下萬民之尊,汝怎樣互伊跪店塗跤,像汝請安咧?!」

太公聽了後,感覺真有道理。第二工劉邦又閣來請安,太公着趕緊走來門口迎接;劉邦感覺奇怪,問原因了後,深深感受到極款兮作法毋着。做皇帝了後,着比老父恰大,毋免有孝序大儂,即款是違背孝道兮。

回宮了後,劉邦即時宣布:尊太公做「太上皇」。「太上皇」,着是皇帝之上,比皇帝恰大,是天下至高無上兮。如此一來,劉邦閣會使竹宮去拜見in老父啦。

三字經--台語本

大觀園:先賢經典 

感動賊仔兮蔡順

黃勁連

蔡順,做囡仔時,老父着過身矣;伊對老母誠有孝。因為厝裡真散赤,伊時常出去外口,抾一寡柴枝轉來燃火。

後來王莽篡漢,天下大亂,厝裡米甕仔無米;伊着去郊外挽一寡塩桑仔來止飢。伊用兩奇菜籃仔貯紅、烏兩種無仝兮塩桑仔。

有一工誠歹運,佇卜轉去厝兮半路去拄着赤眉賊,賊仔共伊兮去路閘咧,問伊為啥物卜用兩奇籃仔貯塩桑仔?伊回答:「烏兮恰好食,卜互老母食;紅兮猶未夠在,家己食,所以共伊分做兩奇貯。」

赤眉賊互伊兮孝心感動,不但無搶伊,閣反倒轉送伊三斗百米佮一支牛腿。

三字經--台語本

大觀園:先賢經典 

三字經

黃勁連

香九齡
能溫席
孝於親
所當執
融四歲
能讓梨
弟於長
宜先知

 

台譯:

黃香九歲,寒儂兮時,會曉先去被空睏,被空燒矣,則互老父去睏。孔融四歲,着會曉將大粒兮梨仔讓互阿兄食。一个儂友孝序大儂是天經地義兮;敬愛兄哥、長輩兮道理,嘛應當早知影兮矣。

 

宗旨:

以上八句,用黃香溫席、孔融讓梨兮故事做儂囝兒、序細兮,愛會曉孝悌。

 

典故:

1.香九齡,能溫席:黃香,字文強,東漢江夏儂。九歲兮時死老母,小小兮年紀會曉有孝in老父;熱天用葵扇曳風,將in老父兮枕頭、被蓆曳乎涼。寒天兮時用伊兮體溫煦燒被空則互in老父睏,二十四孝之一。

2.融四歲,能讓梨:

孔融,字文舉,東漢尾仔魯國儂。細漢着真巧,有一工,儂客送in一籃梨仔,in阿兄提大粒兮食,干焦伊提細粒兮。厝邊問伊啥物緣故,伊講:「我上細漢,應當食細粒兮。」

三字經--台語本

頁數:  55 56 57 58 59 60 61 62 63 64
意見反應信箱:service@king-an.com.tw
Copyright © 2012 真平企業有限公司 版權所有.禁止擅自轉貼