大觀園:散文隨筆 

相機

董育儒

 

        彼台相機是阮兜唯一的一台相機,可惜去予賊仔偷去矣。


        彼是發生佇總統選舉彼工。
彼工,阮囝欲提伊的私奇錢去囥。才發現錢去予人偷去。我轉去故鄉選舉轉來才知影這件代誌。


        原本叫是干焦阮囝的私奇錢去無去矣。了後,愈想愈毋著,阮囝失去了萬外箍,是伊儉幾若冬的錢。我心內才想講愛叫伊提去郵局儉起來,想袂到錢就無去矣。


        到底啥提去?就開始問查某囝有拍毋見物件無?結果伊嘛有。阮就開始詳細檢查厝的物件。才發現全部的財物損失估價起來差不多是五萬箍左右。其中一項是相機。


        自細漢阮兜就足散赤的。讀高中的時陣攏會欣羨有相機通仔用的人。佇現實的生活中,我攏一直認為買相機是好額人才買會起的物件。對我來講,愛我去買一台相機是無可能的代誌。因為,我的生活觀念內底,我是負擔袂起這款有錢人才咧耍的物件。


        毋知佗一冬,阮某竟然會想著去網路訂一台相機。是六千外箍的數位相機(實際價數我毋知,有可能阮某無講實情。)


        其實,阮的生活本底就罕得出去四界行行咧,可能是寒暑假才會出去一遍較遠的所在耍,所以講彼台相機用的機會嘛無偌濟。


        因為,我足煩惱阮囝會袂大,所以,佇伊身懸130的時,我就特別和伊做伙翕一張相。因為,這是我上掛意的身懸。


        本底就罕得翕相,自從相機予賊仔偷去了後。伊偷去的毋但相機。伊連阮的所有的未來攏偷去矣。


        若彼台相機猶佇咧,阮這幾冬來應該會有足濟相片通仔做記念。


        結果,自彼時陣開始,阮就攏無閣有任何相片做紀念。當然,連全家福的相片都攏無。


        最近,開始會曉做網頁,嘛時常去人的網頁行行看看咧。看著人的網頁攏有相片。會當講是圖文並茂,甚至閣有音樂通仔配。


        抑我咧?我無相片通好用,網路的物件閣毋敢共人提來用,驚會惹著無必要的麻煩。所以,我的網頁足單純,有夠僕素的僕素。


        原來,相機的失落,毋是單純的失落,連我的網頁的色彩嘛失落去矣。


海翁台語文學月刊第113期

大觀園:詩歌精選:現代詩 

路燈──予失眠者

林沈默

一葩路燈,
徛踮透明夢中顧暝。

蠓蟲、火金蛄 ,
閣有熱噴噴的蛾仔,
無閒探班、拚命求愛…
佇伊的頭殼尾頂,
撞過去、吵過來。

一直到隔工,
日頭出來囉!
夜蟲傷痕累累、
塗跤死死一堆,
電火公司準時切電,
伊──猶原咧發光。

 

海翁台語文學月刊第113期

大觀園:囡仔古 

囡仔古──貪心的阿水仔

林月娥改編

        古早古早佇真遠的所在,有一粒山,佇半山腰蹛一个查埔囡仔,叫做阿水仔!
        有一工,阿水仔想欲落山去姑婆in兜𨑨迌,伊喔!就捾一kha誠大kha的袋仔落山,準備欲佇路裡挽一寡仔果子,紮予姑婆仔食。
        今仔日的天是清清清,日頭是炎炎炎,天氣有夠燒熱的,阿水仔行啊行、行啊行,行到一區菜園仔邊,伊看著菜園仔裡規片攏是黃錦錦的番麥,日頭照落下,金sih-sih,比金仔閣較媠呢!阿水仔足佮意的,就khioh甲規袋滿滿滿,揹佇肩胛頭繼續行。
        行無偌久,看著一片桃仔園,桃仔欉逐粒桃仔是紅記記,日頭照落下,金噹噹,比璇石閣較顯目呢!阿水仔摸了閣摸相了閣相,伊感覺桃仔比頭拄仔khioh的番麥閣較好,伊就共番麥倒倒出來,挽真濟桃仔囥入去袋仔裡,那行那khoo-si仔。
        閣行無偌久,來到一大片西瓜園,青蘢蘢!逐粒西瓜圓滾滾,肥tsut- tsut,日頭照落下,金sih-sih,比孔雀咧展翼閣較媠呢!阿水仔的喙瀾強欲流落來矣!這馬,伊感覺西瓜是全世界上讚的物件囉!阿水仔共袋仔裡的桃仔倒掉,挽一粒大西瓜lok入去,那行那搖尻川花。
        哇!姑婆的厝就欲到矣!雄雄,對路邊的草埔堆bùn出來一隻兔仔,兔仔毛白siak-siak,跳一下跳一下,紅色的兔仔目,袂輸咧共阿水仔使目尾,比啥物閣較古錐呢!阿水仔毋管三七二十一,共西瓜擲掉,捾彼kha空袋仔,傱去hop兔仔,兔仔一時仔跳這爿,一時仔跳彼爿,跳來跳去,愈跳愈遠,愈跳愈緊,阿水仔逐甲怦怦喘,目一下nih,兔仔早就走甲無看影矣!到尾仔,阿水仔到姑婆厝裡,袋仔裡無番麥、無桃仔、無大西瓜,嘛無古錐的兔仔!袋仔裡空空空,無半項!


        哎!各位囡仔姊囡仔兄,人講痟貪是會軁雞籠,咱人愛知足,毋通心肝較大過牛肺,才會過了幸福閣快樂!我的故事就講到遮,非常多謝!


海翁台語文學月刊第111期

大觀園:詩歌精選:現代詩 

清明培墓

陳玉釵

 

四十外年前阮做囡仔時
清明培墓分兩逝
早起行路去阿公阿媽彼門
下晝阿祖、查某祖彼門較遠較崎
干焦阿爸、阿母、阿叔、阿嬸in大人去
培墓先摒掃,叔伯兄姊薅草、抾糞埽
細漢囡仔徛去墓埕外
大人交代著愛細膩毋通踏著別人的墓龜
墓牌拭清氣祭品排規排
一个碗頭仔貯一項
韭菜、三層、貢丸、滷卵、鰇魚..十外種
閣有一坩炒米粉
一人兩欉香
一請祖先鬥保庇
二謝土地護祖先
清香沓沓仔飄上天
開始放送家族仔的新聞
阿姑大囝讀商的、第二囝讀齒科
竹南阿姑後生食頭路起新厝
有影囡仔人咧大
兩、三年無看就變甲認無啥有
共下沿的面模仔認予明
隨个仔紹介展光彩
兄姊好模範講予細漢的通看樣
斟酒過三巡,跋象桮
囡仔人挂墓紙
一張一張揤入去塗裡
墓牌頂懸嘛用細粒石頭硩一張
燒金放炮仔
炮仔一下放
囡仔規陣傱過來
伸手提著銀角仔,頕頭隨閣傱對別位去
較遠彼爿炮仔佇咧砰砰叫
大人講:後擺牛佮羊才袂來thún踏
古詩有講清明節雨紛紛
咱遮卻是赤焱焱,不時火燒山
所致拍火車規氣守路邊免驚火燒埔
目一下nih
現代社會改進塔,有時好天,有時雨
汽車上山若海湧,一湧退去,一湧來
出出入入愛管制
袂使攑香入去拜,供桌編號囥門埕
濟濟的祭品攢焦料,看著有位著緊櫼
金紙閣愛囥集中,公家備車載去焚化爐
恐驚祖先收袂著,有人金紙緊寫名
清明時節山頂人kheh車窒
來去匆匆
培墓若像風中的海湧
緊起緊落
不而過數念先人的心
不止清明這一工

 

海翁台語文學月刊第172期

大觀園:演講稿 

網路對我的影響

林美麗

          

        秀才免出門,能知天下事;電腦一點通,網路行入生活中

        各位評判先生,各位參賽的同伴逐家好,我是X號,今仔日我欲演講的題目是「網路對我的影響」。
        佇這个科技進步、資訊爆炸的時代,網路會使講是咱生活中的一部份--ah,無論是交朋友、買物件,或者是出門旅遊買車票、訂房間,甚且是賣厝、稅厝、揣頭路…,逐種想會到的抑是想袂到的廣告,攏會使佇網路來完成。不而過,因為網路siunn奢颺,煞予咱siunn過頭依賴,而且沉迷佇內底,按呢就毋是啥物好代囉。


        對阮這種讀冊囡仔來講,網路上大的功能就是娛樂,佇沉重的功課壓力以外,阮上愛利用網路的開講室開講,嘛會使上on-line來相戰,拍妖怪。若無就佇部落格寫文章敨放心情,踮FB頂頭佮朋友相交陪。以早若欲寫論文,的確著愛去圖書館揣資料,毋過這馬網路搜揣系統遐爾發達,「秀才免出門,能知天下事」坐佇厝裡的電腦頭前,溜鼠掠--咧,啄--咧啄--咧就會使進入電腦數位資料中心,內底的資料隨篇仔隨篇攏跳出來佇咱的目睭前。若欲知影課外的智識,去Google共ku一下;若有疑難雜症,去Yahoo『知識+』kâng問一下,網路頂真濟高手就會共咱鬥相共,這攏是網路所紮來的好處。

        水,會使予船駛振動,嘛會使予船反kah空~空。會曉利用網路,伊就會成做咱生活上的助手,若是長時間屈佇網路,嘛是真緊就會迷失去。真濟少年囡仔因為袂曉時間管理,結果煞來網路成癮(ín),便若有閒就想欲開機耍一下,規工頭殼底想的攏是欲按怎練功、升級,欲按怎得著金幣佮寶物,一日耍1、2點鐘哪有夠氣?攏愛耍3、4點鐘才會過癮(giàn),若按呢就毋是咧耍電腦,顛倒是予電腦耍--去--ah。
        講起來蓋見笑,我嘛捌沉迷佇網路頂頭,會記得彼是國中二年的時,我對網路種種的功能攏真煞心(sannh-sim)。放學了後,我會佇開講室佮同學開講,嘛會on-line去佮人拍妖怪,逐日耍啊耍,結果冊無讀,功課無寫,成績落甲強欲吊車尾。我嘛知影晏睏對身體無好,毋過,人線頂的朋友攏耍甲當切熱,我若離線概成足無講義氣--的,所以我就一直共家己講:「koh耍十分鐘就好。」
        結果十分鐘了後koh有十分鐘,誠無簡單線頂的朋友攏欲去睏--ah,倒佇眠床頂,我煞因為拍怪拍甲siunn激動,規个頭殼底攏是會飛天鑽地的妖怪。土想嘛知,第二工哪peh會起來?勉強去到學校,嘛是一直哈唏、無精神。一直到升起去三年,看烏枋頂面的字愈來愈霧,阿母𤆬我去檢查目睭,才知影近視度數又koh加重--ah。自彼陣了後,阿母就嚴格控管我上網的時間,才予我遠離電腦對我的傷害。
        我感覺,掛佇網路頂愈久,對現實社會就愈疏離,親像以早用即時通佇開講室開講,因為互相無看著面,我才有勇氣講家己的心內話,結果面對面煞毋知欲講啥。而且網路是1个虛幻的世界,任何人攏會使佇遮換無仝的身份,致使我無法度對別人產生信任。而且長期操作電腦,毋但近視加深,手骨筋路koh會發炎,實在毋是好現象。好佳哉,我這馬已經會曉自我管理,成績嘛綴人會著--ah,知影愛利用網路增加智識予生活較利便,袂koh再佇網路頂沐沐泅,所以網路對我的影響,實在是好--的較濟䆀--的啦。
        多謝逐家,我的演講就講到遮。(敬禮,下台)


海翁台語文學月刊第136期

大觀園:散文隨筆 

落雨天才有的幸福

黃慧雯

      這幾工,受著鋒面影響,幾若個月無雨水的臺灣總算落雨矣,而且一落就是一禮拜。及時的雨水毋但予大自然的花草重閣發穎,閣予枵飢失頓的水庫,做一氣食甲飽-inn-inn。政府一解除限水,洗頭毛店、洗車行佮大細間餐廳總算會當笑微微,免閣煩惱無水的問題矣!充足的雨水毋但趕走洘旱焦phí-phí的艱苦日子,閣予我想起囡仔時代雨天才有的幸福。
      阮細漢的時陣,號做「五跤仔」的阿爸,常在蹛厝蹛袂牢,不時佇外口拋拋浪。伊凡勢去廟裡佮人行棋,凡勢揣朋友泡茶講政治,嘛常在騎機車去斗六的股市佮人櫼,向望手頭彼幾張股票會當替伊趁大錢。毋過,若拄著落雨天,伊就會乖乖仔踮厝,替阿母鬥顧囡仔,予阿母會當規心車衫仔趁錢。
     

      無去四界摸飛的阿爸,會招阮耍撚骰仔。這个遊戲需要一張白紙、一个碗公、一粒骰仔佮一寡仔銀角仔。白紙頂懸畫六个平大的格仔,格仔內寫數字一到六。阮愛先共銀角仔囥佇數字抑是數字之間的線,了後等阿爸撚骰仔。骰仔佇碗公內底踅圓箍仔,停落來了後,向天彼面的數字若佮阮臆的相仝,阿爸就會賠阮錢;反倒轉,阮若臆無著,錢就愛予阿爸咬咬去。錢硩線,賠一半,錢硩格仔,賠一倍。我較無膽,總是硩線,小弟較大心肝,攏共錢硩數字,尾仔往往是連本帶利輸輸去。
      落雨天毋但有阿爸陪阮耍,閣有阿母煮的好料理──麵粉糋通啖糝。惜囝的阿母,驚囡仔落雨天無通出去,會喝無聊,總是撥工走去灶跤變(pìnn)一寡仔麵粉糋予阮窒喙空。麵粉糋的內容千變萬化,茄仔、芋仔、番薯、葱仔,甚至是過年時仔食無了的甜粿,攏會當提來用,橫直厝裡有啥物就糋啥物。有一擺,阿母揣無物件通好糋,臨時變竅,去共牆圍仔頂遐的黃錦錦的菜瓜花挽落來搵麵粉糋予阮食。彼種酥酥脆脆閣甘甜仔甘甜的滋味,到今我猶會記得。
      感謝阿爸佮阿母的用心,予阮囡仔時代的落雨天,充滿美麗的回憶。


海翁台語文學月刊第167期

大觀園:詩歌精選:囡仔詩 

胡蠅

吳珍勝

 

胡蠅有影誠厲害
好料上桌伊隨知
身軀無洗就飛來
菜湯洗跤真囂俳
害阮食甲攏落屎

 

海翁台語文學月刊第136期

大觀園:散文隨筆 

食桌

蔡連眞

      雖然時代的進步佮衛生保健的觀念一直咧提升,毋過;佇人情世事的往來當中,「食桌」的民情風俗猶是無法度來改變,也佇親情朋友之間繼續咧轉踅,凡勢這嘛是人佮人之間感情咧維持的原動力。
      較早的年代莫講是「食桌」,三頓若有通食就已經眞好矣,所以講無論是年冬月節,抑是神明生咧做醮拜拜甚至是普渡佮祖先的忌辰,攏是家家戶戶比較較有食食,會當來食予較腥臊較豐沛的時陣,當然這个時陣若是有人客來,囡仔大細就愛來流喙瀾矣。
      其實,咱台灣人是上有人情味的,佇農業時代每一口灶的頭喙比較有較濟,「食桌」的時做主人家--的,就是平常時仔伊的食穿有較儉,這个時陣嘛愛儉家己,盡量來予人客會當去體會著彼種「有食閣有掠」的感覺,可比講:若食到桌尾的時一般攏會出兩路菜,就是雞卵糕佮丸仔,彼當時的雞卵糕雖然佮這陣的『生日蛋糕』袂比得,毋過,卻是眞搶市,彼是用純的雞卵佮麵粉、烏糖所做的四四角角一塊若豆腐咧,食著實在是眞芳閣眞綿,而且一盤眞大盤,有夠通予逐家用手巾仔包轉去予囝兒序細食,食一个甜來分享彼个喜氣。
      若是丸仔湯;當然嘛是大碗閣滿墘,湯的配料是用芫荽、芹菜、胡椒粉為主,丸仔本身的原料是用眞本眞料的旗魚抑是虱目魚所做--的,毋是一般的魚漿所做--的,所以講:伊食起來的滋味是愈哺愈芳愈有滿足感,彼種氣口回想起來眞正會予人流喙瀾,問題是「食桌」的人攏干焦lim湯爾爾,共一大碗公的湯lim甲空空空,丸仔卻是攏囥佇家己的碗內,恁敢會知影彼原因到底是按怎?原來就是仝款欲提轉去予無來參加宴會的人食,彼个年代主家並無提供塑膠袋仔,所賰的菜攏做菜尾來分予厝邊隔壁,所以攏就愛用家己的箸,共丸仔攕予規攕才紮轉去,予厝內的人仝款會當沾著圓滿團圓的光。
      現此時若講著「食桌」攏是拚面子--的,為著現場的氣氛欲較奢颺咧也不得不愛來參加,因為經濟發展逐家攏食眞好,若毋是驚血壓懸就是驚血油傷洘,所以講:桌面的菜色是看的比食的較濟,嘛無彼兩路使人懷念的菜,就是傳統所做的雞卵糕佮丸仔湯矣。
      俗語講:「一好佮一䆀,毋通兩好來相排。」食桌文化嘛隨著時代的演進,沓沓仔來咧改變,為著健康咱食物嘛是愛有站節,對家己的食桌風度嘛愛有節制,較袂來落氣無面子。
     

      以下提供食桌文化的笑談予逐家做參考:
      食物有撇步,面子就愛顧,毋通起糊塗,予人笑咱粗,一塊吞入肚,一塊卡喉箍,一塊喙內哺,目睭睨喔喔,箸閣到半途,咧食若piah虎,食甲起艱苦,腹肚親像鼓,實在無法度,趕緊揣便所,煞來落兼吐,何必彼當初。

 

海翁台語文學月刊第120期

大觀園:俗諺 

有許媽超就無北港媽,有北港媽就無許媽超

顏之群

        咱講台南下營舊名號做海墘營,因為遮較早倚倒風內海,閣捌有鄭成功的軍隊佇遮開墾。後來,溪河對上游一直帶塗沙落來,沓沓仔共倒風內海坉()做陸地。早期台灣西部河運發達,佇「海墘營」這个倚海的所在嘛仝款。彼陣對倒風內海入來的船,會當沿下營大溪一直駛到這馬已經離海二、三十公里的茅港尾天后宮後壁。茅港尾這馬屬於下營區中營里,佇清朝統治台灣的時,茅港尾因為佇來往府城佮諸羅山的官道中點,閣有天然的河港,發展了誠鬧熱,有小揚州之稱,人口上濟的時超過一萬人。嘛因為貿易發達,加上真濟上北落南的過路人,攏會佇遮歇睏、隔暝,茅港尾街閣採取人車分道,是當時台灣誠少看的雙顯街。
        茅港尾天后宮供奉的媽祖,是對中國湄州直接分靈過來的,往過三年一科的府城祀典大天后宮迎北港媽割香,攏會來到「茅港尾天后宮」歇暝,各地的信徒、陣頭,予原本就鬧熱滾滾的茅港尾街是相挨相kheh,會當講是地方重要的大代誌。當地有真濟媽祖靈聖的故事,親像「媽祖坐監一百年」,就是發生佇茅港尾。西元1862 年,茅港尾天后宮的金爐雄雄發爐,媽祖嘛降駕,警告村民有災厄欲發生矣。逐家掠準是有盜賊欲來,攏趕緊轉去用枋仔共厝裡的門窗釘起來,防止盜賊侵犯。準備好了後,逐家攏毋敢睏,一直等到半暝,閣無看著盜賊,想袂到突然之間,一陣天崩地裂,是大地動!茅港尾的村民,雖然攏猶清醒,煞因為門窗釘甲密密,無法度逃命,造成嚴重的傷亡。後來,媽祖閣因為漏洩天機,予天庭罰坐監一百年,茅港尾嘛因為媽祖坐監,沓沓仔沒落矣。
        許媽超是茅港尾天后宮的董事,毋過伊靠勢家己佇地方的力量,閣有一群鱸鰻倚伊,定定惹事,逐家攏無伊的法。有一擺,閣拄著三年一科的天后宮迎北港媽,割香的香陣,沿南北官道行
,虔誠的信徒沿路參拜,這工已經來到茅港尾天后宮。這當陣,許媽超拄好佮六甲的李某人有糾紛,雙方人馬佇kheh 櫼櫼的茅港尾街發生衝突,四界冤家相拍,甚至衝入香陣,毋但對媽祖真無尊重,嘛予茅港尾人誠無面子。長期受許媽超凌治的村民攏看袂落去,逐家大聲喝講:「有許媽超就無北港媽,有北港媽就無許媽超」,講也奇怪,這時媽祖鑾轎嘛雄雄改變方向,直直衝對許媽超in 兜去,許媽超看著這个情形,驚一下趕緊逃走。後來「有許媽超就無北港媽,有北港媽就無許媽超」這句話就開始流傳,予人用來形容雙方水火不容的狀況。
        佇這个故事內底,許媽超是橫霸霸的麻煩人物,毋過佇1862 年的彼改大地動了後,伊出錢出力,招逐家做伙重建茅港尾天后宮,嘛是有伊的貢獻。1962 年,媽祖坐監已經一百年矣,媽祖為著欲予逐家知影伊已經出獄,佇廟後的田裡顯靈,浮出一塊石碑。這一百冬來,這塊田經過幾若代人種作,攏毋捌挖著石碑,煞拄好佇媽祖坐監一百年後出現。閣有人講,這塊石碑是許媽超後來為著欲破壞天后宮後面的龍穴所埋落的,嘛是致使茅港尾沒落的一个原因,予媽祖佮許媽超的故事,增加閣較濟的話題,綴著俗語代代流傳。

 

海翁台語文學月刊第158期

大觀園:俗諺 

修心較好食菜

李鳳

      因為智慧,所以人看起來有氣質;因為慈悲,所以人看起來美麗。做善事的方法有真濟,用關心的眼神看人、用親切的態度佮人鬥陣、用溫暖的雙手幫助人、用慈悲的心祝福人。有善良慈悲的心,就愛及時去做好代,共愛傳出去,干焦用想的、喙咧講咧唸佛,按呢就敢若佇空中欲起厝,無實在。


      有一个故事會當說明幫助人愛及時去做,毋通空喙哺舌:戰國時代,莊子的生活真散赤。有一擺,伊的厝內連一粒米都無,大人囡仔攏已經枵甲大腸告小腸,伊只好去共監河侯借三升米,監河侯一聲共應好,講:「好啊,毋過阮兜這馬的米糧賰無偌濟,閣過一暫仔,我共百姓收稅金了後,才閣借你三百兩黃金。」莊子聽了,笑笑仔講:「我來恁兜的路裡,聽著一隻魚仔咧喝『救命喔,救命喔!』我越頭看,彼隻魚仔佇一个焦涸涸的窟仔內底,伊懇求我:『敢會當拜託你倒幾杯仔水入來窟仔內底?』我共應講:『好啊,我先去南方共吳王、越王借水,才閣共西江的水引來遮,予你會當轉去東海。』我掠準我遮爾好心,欲幫伊引西江的水來,伊應該會感謝我,想袂到伊煞起受氣,講:『你是啥物意思?這馬只要幾杯仔的水,我就會當活命,你閣佇遐拍拉涼。你若按呢,不如較早去賣魚仔乾的所在揣我。』」莊子是咧剾洗監河侯,既然無想欲鬥相共,嘛無必要提籃仔假燒金──假好心。


      莊子這段故事會當予咱了解:假好心不如減講譀話,明明有才調共別人鬥相共,卻是毋肯,這種人實在真無彩,放棄修心做善事的機會。進前看著新聞咧報:有的殺人兇手刣死人了後,開始食菜念佛抑是信耶穌來減輕罪惡,這就是未起大厝,先起護龍的代誌。捌聽過序大人「心歹免食菜,朋友好免結拜」。心肝若無好,就算講三頓攏食菜嘛是無路用的,所以才有一句俗語:「修心較好食菜」,只要心肝善良,定定做好代講好話,這比食菜閣較實際。所以才有人咧講:心肝若好,風水免討。「修心較好食菜」毋是咧反對食菜,是咧強調修心佮實踐善行的重要性,向望咱修心、做善事毋通予外在的形式縛跤縛手,抑是用喙講講的爾爾,親像監河侯按呢假好心。修心就是欲予咱先有清淨心,紲落是實踐,知為先,行為重,知行合一。凡事用「愛」做出發,共人性本善的天性表現出來,若按呢毋但對人有幫助,對社會嘛有貢獻。實踐修心、善行真簡單,毋免有真濟的財產、高深的學問,抑是真厲害的本事,生活當中就有真濟好事善事通做,譬如講:捐發票、做義工、整理家己用袂著的文具佮衫仔褲予需要的人,抑是做代誌的時予別人感覺方便等等,「勿以善小而不爲」莫想講這是小事小善就毋做,細細滴的水滴滴久嘛會共石頭迵過去,所以一个小小的笑容、小小的善行,就會當廣結善緣。


      咱無一定會因為趁錢所以變好額人,毋過咱會當因為修心,予咱的心內變快樂閣富裕;咱無一定會因為食菜所以心肝變善良,毋過咱會當因為付出善行,予家己佮身邊的人感受著世間溫暖的真情。


海翁台語文學月刊第151期

頁數:  2 3 4 5 6 7 8 9 10 11
意見反應信箱:service@king-an.com.tw
Copyright © 2012 真平企業有限公司 版權所有.禁止擅自轉貼