大觀園:先賢經典 

月下獨酌 李白

花間一壺酒,獨酌無相親;
舉杯邀明月,對影成三人。
月既不解飲,影徒隨我身;
暫伴月將影,行樂需及春。
我歌月徘徊,我舞影零亂;
醒時同交歡,醉後各分散。
永結無情遊,相期邈雲漢。

影片欣賞

來源:youtube

大觀園:先賢經典 

登幽州台歌  陳子昂

前不見古人,
後不見來者。
念天地之悠悠,
獨愴然而涕下。

 

送崔九  裴迪

歸山深淺去,
須盡丘壑美。
莫學武陵人,
暫游桃源裡。

影片觀賞

http://taiwanus.net/church/index3/201103240212041356.htm

大觀園:台語教學 

台羅音標教學(一)


單母音:a  i  u  e  o  oo(o.)

...

«繼續閱讀»

大觀園:台語教學 

台語基礎教學

第一課  相借問(sio-tsioh-mn̄g)【問候】

對話2 多謝(to-siā)【謝謝】

老師(lāu-su):你好。(lí hó。)【你好。】

學生(ha̍k-sing):你好。(lí hó。)【你好。】

老師:咱開始來上課。(lán khai-sí lâi siōng-khò。)【我們開始來上課。】

  我講台灣話;你聽有--無?(guá kóng tâi-uân-uē;thianū--bô?)【我講台灣話;你聽得懂嗎?】

學生:聽無。(thian bô。)【聽不懂。】

      請koh(閣)講--一擺。(thián koh kóng--tsi̍t-pái。)【請再說一次。】

老師:我koh講--一遍。(guá koh kóng--tsi̍t-pián。)【我再說一次。】

      按呢聽有--無?(án-ne thianū--bô?)【這樣聽懂沒?】

學生:聽有ah(矣)。多謝。(thianū--ah。To-siā)【聽懂了。謝謝。】

老師:免客氣。(bián khen-khì。)【不客氣。】

影片欣賞

哈佛台語101

大觀園:台語教學 

台語基礎教學

第一課  相借問(sio-tsioh-mn̄g)【問候】

對話1  早(gâu-tsá)【早安】

學生(ha̍k-sing):老師,早!(lāu-su,gâu-tsá!)【老師,早安!】

老師(lāu-su):早!(gâu-tsá!)【早安!】

              食飽--未?(tsia̍h-pá--buē)【吃飽了嗎?】

學生:食飽ah。(tsia̍h-pá—ah。)【吃飽了。】

        你敢食飽ah?(lí kám tsia̍h-pá--ah?)【你吃飽了嗎?】

老師:我嘛食飽ah。(guá mā tsia̍h-pá--ah。)【我也吃飽了。】

 

哈佛台語101

大觀園:演講稿 

佮阮鬥陣做環保

 

  各位老師,各位同學,逐家好,我是第三號。今仔日我欲演講的題目是「佮阮鬥陣做環保」。

  這幾冬,因為天氣的反常變化,世界各地發生真濟天災,親像前一站仔冰島發生火山爆發,致使全歐洲的飛行機攏停飛,造成真大的損失。其實專家早就未卜先知,有咧四界放送,講地球受傷破病矣,苦勸咱愛重視環保的問題,若無者,天災會真捷來發生,三不五時就落大雨,親像88水災仝款,無代無誌做大水,害百姓家伙去了了,目屎掰袂離。毋是做大水,就是地牛翻身,像中國青海遐,塗埆厝倒規排,百姓悽慘落魄,害溜溜。

  所以咱一定愛做環保,因為地球干焦一粒爾,咱若無好好來保護伊,無的確將來會發生啥物大災難,因為「天欲變,一時間」,等災害發的生時就已經袂赴矣。

  佇平常時仔,咱就會當做環保矣,親像阮的學校一直攏有咧做環保,老師上課嘛有講過,愛隨時做環保,環境才會好,所以請你佮阮鬥陣來替地球療傷,予伊較早好起來。請問各位,恁敢知影日常當中咱會當做啥物代誌來保護地球咧?

1

  第一,塑膠橐仔毋通用,塑膠橐仔會造成環境的負擔佮汙染,所以,咱若是去買物件,上好是家己紮袋仔。

  第二,莫使用免洗的箸佮碗,用了就隨擲掉的物件,雖然真利便,毋過伊會製造足濟糞埽,所以咱應該盡量家己紮環保箸,按呢嘛較衛生。恁看,這就是我紮佇身軀邊的環保箸,恁敢有按呢做咧?

  第三,資源回收的工課愛澈底,像阮學校攏會提醒學生糞埽愛分類,有一首台語囡仔詩:「做環保,有撇步,照起工來摒糞埽;罐仔矸仔分清楚,踏予扁,抾予好;字紙回收再製造,會當寫字佮畫圖;咱若仝心做環保,環境清幽人呵咾。」咱若照這首囡仔詩的內容來做環保,相信無偌久,地球就好勢好勢矣。

  第四,盡量使用再生紙,恁敢知影一本冊愛剉偌濟樹仔?樹仔若愈來愈少,就無法度放調整地球的空氣,按呢就會造成空氣愈來愈䆀。所以,請你和我盡量來用再生紙用行動來做環保。

  做環保絕對毋是凊彩講講咧,是一定愛講會到做會到的,我真希望逐家攏會當和我鬥陣做環保。南極的冰山溶去的速度愈來愈緊矣,早慢有一工會做大水,俗語講:好天著存雨來糧。趁這陣閣會當挽救,咱就愛同心協力,毋通抱著「日頭赤焱焱,隨人顧性命」的想法。咱攏是地球的一份子,咱攏蹛佇台灣,咱攏有責任,保護地球,保護台灣。

  只要恁佮我鬥陣來做環保,按呢咱台灣永遠是寶島。

真平台語編輯群

大觀園:演講稿 

好天,著存雨來糧

  演說示範>>

  各位老師,各位同學,逐家好,我是編號第○號,今仔日我欲演講的題目是「好天,著存雨來糧」

  古早人講:「好天,著存雨來糧」,這句話是咧講佇代誌猶未發生進前,著愛先做好拍算,像講佇咧天氣好的時陣,糧草著愛攢予便,才毋免臨時硞硞傱。俗語講:「天欲變,一時間。」人生海海,無可能一冬三百六十五工,逐工攏掛無事牌,總是有緊急的時陣,咱若平常時仔有準備,臨時才袂來趕狂。「好天,著存雨來糧」,就親像風颱欲來矣,咱愛先做好防颱準備,才袂有性命的危險。

  會記得阿公定定共我講「好天,著存雨來糧」這句話,當我愛耍,無愛做功課讀冊的時,伊就會用「好天,著存雨來糧」來苦勸我,伊閣講:「花開在春天,求學在少年。」意思是講少年的時陣,著愛好好利用時間,認真拍拚去學習,若是干焦知影迌,就會親像古早人講的:「少年袂曉想,食老毋成樣。」

  狗蟻會曉準備食的物件來渡過冷霜霜的冬天,連蜂嘛知影趁春天花開時,緊拍拚採花蜜;膨鼠佇秋天的時,就將樹子攢起來囥。遮的動物攏知影寒天歹揣食,佇進前就共食的物件先準備予便,連動物著知影「好天,著存雨來糧」的道理,抑咱人咧?

  早前台灣景氣真好,各行各業攏真發展,「台灣錢,淹跤目」實在有影,毋過最近的台灣,社會治安有夠亂,經濟閣較慘,這个時陣更加需要「好天,著存雨來糧」,時機,就愛勤儉,「勤儉才有底,浪費不成家」,細條錢慢慢仔儉,等到有一工急欲用錢的時,才袂著急。若是這陣閣烏白浪費,毋知影「好天,著存雨來糧」,等到經濟若bai2就只好枵腹肚啊!

  俗語講:「無風無搖倒大樹」,意外若是欲發生,是袂事先共咱通知的,平平路有時嘛會跋死人,人生的路途本來就坷坷坎坎,有智慧的人,佇咧無風無湧的時陣,伊就時時提醒家己做好準備,咱愛樹頭徛予在,才毋驚樹尾做風颱。俗語講:「人無千日好,花無百日紅」。所以,「好天,著存雨來糧」。我的演講到遮結束,多謝各位!

真平台語編輯群

大觀園:演講稿 

我的心願

   

  各位評判先生、各位來賓、各位同齊參賽的朋友,逐家好!我是第○○號,今仔日我所欲演講的題目是「我的心願」,「我的心願」。

  相信咱每一个人攏有家己的心願,有的人想欲做醫生,予遐艱苦病疼的人會當恢復健康;我嘛聽講有的同學想欲做一个太空人,欲去無人去過的宇宙冒險。有的想欲變成周杰倫,佇舞台頂唱歌。每一个人攏有伊的心願,我嘛仝款,我上大的心願就是欲做一个音樂家。

  佇我猶閣咧讀幼稚園的時陣,定定覕佇阮阿姊房間外口,看伊咧學鋼琴,伊彈鋼琴的姿勢真水,真有氣質,予我真欣羨,所以佇我幼稚園畢業,欲入小學的彼个歇熱,我就主動共阿母講,我想欲學彈鋼琴,阿母一聲就答應。毋過伊話先講在先,伊講:彈鋼琴毋是赫爾簡單的代誌,愛骨力練習,才會當和阿姊共款遮爾厲害。伊閣講「一勤天下無難事」,愛我逐工攏愛彈,袂使貧惰。我搭胸坎掛保證,一定會拍拼學的。阿母我請老師來阮兜教我,我歡喜甲喙笑目笑。

  頭起先我誠興,逐工攏期待鋼琴老師來阮兜教,伊教了,我閣毋甘離開,猶原繼續彈。毋過幾若個月過去矣,我開始有淡薄仔厭,因為逐禮拜我攏必須愛開真濟時間練習,才有法度佇老師的面頭前共伊交代的歌譜彈甲真順序;尤其是佇我開始連紲參加幾若擺檢定了後,我坐佇鋼琴頭前的時間愈來愈久,而且,就算我犧牲佮同學去迌的時間,嘛無一定彈了好。彼个時陣我誠失志,足想欲放棄的,毋過,想著當初時我答應阿母愛拍拼認真學,若是頭興興,尾冷冷,半途就來放棄,實在對不起伊,所以我只好喙根咬咧繼續練習。頂學期,音樂老師竟然推荐我佇畢業典禮的時彈畢業歌,予我真大的鼓勵。我才閣開始抱著滿腹的熱情去彈鋼琴。

  有一條歌叫「愛拼,才會贏」,內底有一句話:三分天註定,七分靠拍拚。真正有理。我若想欲達成我的心願,做一个音樂家,就袂使揣藉口,袂曉泅水,嫌溪隘。這馬我學鋼琴已經有五冬矣,我相信「有心拍鐵鐵成針」,總有一工我會當變做一个音樂家,環遊世界,四界表演,予逐家攏知影我是對台灣來的音樂家。

  我的演講到遮結束,多謝大家!

真平台語編輯群

大觀園:講笑詼 

膨鼠買蘋果

    有一工,一隻生做足古錐的膨鼠來到一間五金店,伊佇店裡踅來踅去毋知咧揣啥物物件。

    頭家真好奇,就共伊講:「你欲買啥物物件,我替你揣較緊啦!」膨鼠就共頭家講:「頭家,請問恁遮敢有咧賣蘋果?」頭家真親切,喙笑目笑共伊講:「無呢!阮遮是五金店,無咧賣蘋果。」膨鼠共頭家說多謝就走矣。

    隔轉工,膨鼠又閣走來五金店,伊問頭家:「頭家,恁遮敢有咧賣蘋果?我想欲食蘋果呢!」頭家感覺怪怪,毋過猶是真好喙共伊講:「阮遮無咧賣蘋果啦!」膨鼠頕一个頭,說多謝就走矣。

1

    第三工,膨鼠又閣走來矣,伊一入門就開喙問頭家:「頭家,請問恁遮敢有咧賣蘋果?」頭家真受氣,就共膨鼠講:「阮遮無咧賣蘋果啦!你若閣來亂,我就提鉸刀共你的尾溜鉸掉。」膨鼠掣一趒,「啊」一聲就緊旋矣。

    想袂到,第四工膨鼠閣來矣,毋過伊干焦徛佇外口向店裡探咧探咧。頭家想著昨昏對膨鼠真歹聲嗽,感覺歹勢歹勢,就擛手叫伊入來,閣問伊欲揣啥物。膨鼠頭敧敧想想咧,就講:「請問恁遮敢有咧賣鉸刀?」頭家講:「歹勢,鉸刀拄好欠貨呢。」膨鼠吐一个大氣,閣問:「按呢恁遮敢有咧賣蘋果?」

大觀園:講笑詼 

長頷鹿佮兔仔

       
  長頷鹿佮兔仔兩个袂合。因為長頷鹿的頷頸長,耳仔短短,伊看袂慣勢頷頸短短、耳仔長長的兔仔;兔仔愛食草仔佮水果,伊看袂慣勢長頷鹿干焦愛食樹葉仔無健康。所以逐擺長頷鹿若佮兔仔相遇,就會一直相觸袂煞。

        熱天的下晡,長頷鹿又閣佇路裡搪著兔仔。伊喙笑目笑,先共兔仔問好:「兔仔你好,誠久無看你出來七迌矣!」兔仔嘛笑笑應講:「長頷鹿你好,我嘛是誠久無看你出來七迌矣!」長頷鹿笑笑,刁故意咬一喙樹葉仔,然後慢慢仔吞落去,才共兔仔講:「兔仔,你攏毋知影頷頸長的好處,無論食著啥物好食的樹葉仔,我咧食的時陣,樹葉仔會當慢慢仔通過我長長長的頷頸,予我沓沓仔享受樹葉的好滋味。」兔仔聽了,干焦頕頭,攏無講話。

1

        長頷鹿看兔仔攏無反應,閣繼續講:「若拄著熱天,啉冰水的時,清涼的冰水會慢慢仔對我的喙流向我長長長的頷頸,予我感覺規身軀透心涼。兔仔,你攏毋知影,有一个長長長的頷頸實在是有夠好的!可惜你攏無這个福氣。」

        兔仔聽煞,干焦微微仔笑,一點仔攏無受氣。長頷鹿看兔仔無受氣,顛倒家己氣甲趒跤頓蹄,講:「有啥物好笑的?」兔仔看著長頷鹿氣怫怫的模樣,就笑笑仔講:「長頷鹿,你敢有『掠兔仔』過?」

真平台語編輯群

頁數:  58 59 60 61 62 63 64 65 66 67
意見反應信箱:service@king-an.com.tw
Copyright © 2012 真平企業有限公司 版權所有.禁止擅自轉貼