大觀園:演講稿 

熱人的生活

朗讀>> 

    熱天若到,日頭一透早就出來共逐家拍招呼講gau5早,欲予逐家知影伊有偌熱情。樹頂的蟬仔嘛吱吱叫來鬥鬧熱,若親像咧共逐家通知:「熱人到矣!熱人到矣!」我本底睏甲真落眠,嘛去予伊吵精神,阿媽嘛咧講:「日頭曝尻川矣!緊起來食早頓。」我只好對眠床頂跳落來,換衫、洗面、漉喙,食飯飽以後,我就出去外口行行踅踅咧,一出大門,哇,日頭赤焱焱,熱人真正到矣。

  行去公園,蓮花池的蓮花開甲誠媠,圓圓的蓮葉下面閣有魚仔咧覕相揣,敢是因為日頭傷炎,所以才佇遐歇涼。我坐佇樹仔跤,欣賞花園的花開甲滿滿是,蜂仔、蝶仔颺颺飛,閣有田嬰咧表演飛行特技,實在有夠趣味。風微微仔吹,花的芳味一陣一陣四界送,這个時陣若是閣來一支枝仔冰,絕對心涼脾土開。

  時間無早矣。俗語講:「貧惰人,講有話」,有的人總是為家己的貧惰揣藉口,講啥物熱人傷熱,無心情讀冊,結果一日走拋拋,一暝點燈蠟。我當然袂使按呢做,雖然今仔日是禮拜,毋過猶是趕緊來去圖書館看冊。圖書館有冷氣通吹,有真濟冊通看,一兼二顧,摸蜊仔兼洗褲,我愛好好利用時間來充實智識。

  熱人雖然天氣誠熱,熱甲予人心情真齷齪,毋過若想著熱人的時,四界攏是青蘢蘢的樹仔、草仔,充滿著活潑的生機,我的精神就好起來,並無因為燒氣來影響著我,心靜自然涼嘛。

  因為熱人的時較早天光,早起時天氣真涼爽,所以我會較早起來運動,予家己一工的精神變甲真好,然後才來看冊。有當時仔,我會去附近的公園散步,聽鳥仔開演唱會,看蓮花展姿勢,若是想欲看冊,就帶一本課外讀物去看,毋免聽音樂,四界的天然音樂就好聽閣袂跳針。

      熱人到矣,你欲按怎安排你的生活咧?是毋是覕佇房間內,抑是規工坐佇電視頭前,啥物代誌攏無做?最後才來怨嘆家己浪費時間,無好好把握。

真平台語編輯群

 

大觀園:演講稿 

我的心願

        每一个人攏有伊的願望:爸母向望囝兒會當平安大漢;作穡人向望田園會當豐收;生理人向望會當年年大趁錢;政治家希望國家興旺。啊我咧,我希望我會當發明一種消除污染的機器,共咱的地球變甲清氣噹噹。

        前一年歇熱的時,我佮阿爸、阿母去紐西蘭tshit迌,阮入去一个遊客中心,看著壁面貼一个印地安人的相片。阿爸共我講,這个人是一个印地安的頭目,就是伊,才予紐西蘭政府開始重視環保問題的。因為伊捌對美國人講:「恁用錢敢買會著天頂佮土地的芳味?恁敢有才調用錢共空氣佮水攏買起來?」這句話予紐西蘭的人覺醒著愛好好保護大自然,所以真認真咧推捒「做環保」這件代誌。我去紐西蘭迌的一禮拜,看著真濟專門予人擲回收的糞埽桶,嘛看著一寡田庄有真好的設備,會使共庄裡的糞埽回收再製造。我深深感受著這个國家做環保毋是用喙講講就準拄煞,確實是用行動來落實。嘛因為紐西蘭真用心咧做環保,所以遮真清氣,大自然的景緻媠甲若仙境,所以紐西蘭才得著「人間淨土」的封號,全世界的人攏相招來這个國家tshit迌觀光。

1

        轉來到台灣,我看著街仔路四界攏有人咧烏白擲糞埽。尤其是風颱天過了,海邊仔攏是糞埽,有人擲捔(tàn-hiat-ka̍k)的鞋仔、杯仔,嘛有衫、褲。進前我看著新聞講,有人偷偷共油攏摒落去溪裡,結果高美濕地的水筆仔攏予油污染,造成真嚴重的破壞。以早葡萄牙共台灣叫做Formosa,咱看這馬的台灣,早就毋是彼个通人呵咾的美麗之島矣!

        所以,我希望我將來會當發明一種消除污染的機器。會當共空氣中、水裡抑是塗裡的歹物仔佮垃圾(lah-sap)攏總吸起來,然後變做有營養閣無污染的肥料,將咱的環境變甲誠清氣,予外國人聽著「台灣」兩字就比大頭拇喝讚。為著欲達成這个心願,我決定欲拍拚讀冊。雖然這馬我猶閣細漢,毋過我相信只要堅持到底,將來一定會發明這種機器,達成我的心願。

        我的演講到遮為止,多謝逐家!

真平台語編輯群

大觀園:演講稿 

趣味的台語

  揤遮聽這篇文章>>

  電影「海角七號」內底的茂伯仔,伊定定掛佇喙邊的一句話,就是「我是國寶呢」!阮兜嘛有一个國寶,伊就是我的阿祖。

  阿祖雖罔毋捌字,毋過伊足講好聽話,用食喜酒、食茶做例,阿祖唸的四句聯,敢若真珠串連咧,逐家斟酌共聽詳細:「新郎腹內好將才,新娘今日上大牌,感謝月老gau5安排,起造幸福大舞台。」「翁某感情糖蜜甜,兩人牽手出頭天,闔家平安大趁錢,囝孫富貴萬萬年。」「新娘真媠真好命,內家外家好名聲,準備甜茶來相請,祝福金銀滿大廳。」「新娘生做真正媠,親像唐朝楊貴妃,毛烏肉白真高貴,夫妻恩愛永相隨。」恁看,台語是毋是真趣味,每一句話攏親像咧吐象牙仝款,聽的人歡喜,講的人嘛心適。

  台語本身就有伊的音樂性,用唸的就親像用唱的仝款,比如囡仔歌〈白翎鷥〉:「白翎鷥,捙畚箕,捙到溪仔墘,跋一倒,抾著兩仙錢。一仙買餅送大姨,一仙儉起來好過年。」閣有一首囡仔歌〈草蜢仔公〉嘛誠心適:「草蜢仔公穿紅褲,趕牛去賣布,趁錢通娶某,新娘仔大腹肚,正月生查埔,二月生查某,拍銅鑼,挵大鼓。」這兩首囡仔歌若是用華語來唸,就看袂出伊的趣味,毋過若用台語來唸,就予人感覺誠心適。

  有的人講伊台語嘛會通,毋過講出來的話真正是予人笑破腹肚皮。比如講「咱攏是台灣人」唸做「咱挵死台灣人」,「我的朋友有真濟人拜神」唸做「我的朋友有真濟人敗腎」,這就是聲調唸毋著的關係,所以講台語著愛注意聲調問題,若無,是會製造誠濟笑話喔!

  閣有一寡台灣俗諺嘛誠趣味,會當應用佇咱的日常生活當中。像寒人的時陣,大人會認為踮厝裡較溫暖,毋過囡仔就無仝矣,猶原佇外口耍甲笑咍咍,這个時陣咱就會當講「囡仔人尻川三斗火」來形容囡仔人較毋驚寒。

  若欲講人固執,就會當講「牛,牽到北京也是牛」。

  若欲形容人的心情哀怨,就會使講「心肝親像彈月琴」。

  若欲講人做代誌一舉兩得,就是「一兼二顧,摸蜊仔兼洗褲」。

  若欲形容人毋知家己幾斤重,就會使講「枵貓數想水底魚」。

  若欲苦勸做人序大的,毋通傷寵倖囡仔,咱就會使講「倖豬夯灶,倖囝不孝」。

  若欲講人好心無好報,就會使講「好心予雷唚」。

  若欲形容人聽甲誠專心,就會當講「聽甲耳仔覆覆」。

  若欲講人遇著麻煩,心情鬱卒,就會使講彼个人這馬是「一粒頭,兩粒大」。

  若欲講人瘦罔瘦,毋過誠食,就會當講伊是「瘦田欶水」。台語是毋是誠心適、誠趣味咧!

  俗語講:「毋是新婦,是作料夠。」所以只要咱去認捌台語的媠,共台語學予好,按呢就會當講出誠心適、誠趣味的台語喔!

 

真平台語編輯群

大觀園:演講稿 

食暗頓的時陣

揤遮聽這篇文章>>

  看著媽媽佇灶跤傱來傱去的形影;聽著灶跤鏗鏗鏘鏘的聲音;當一陣一陣的芳味對桌仔頂飄送過來的時,食暗頓的時間就欲到矣。

  四點一放學,我攏是上早到厝的人,彼時,阿母開始咧準備暗頓的物件,我就會佇邊仔看,一面講學校發生的代誌予阿母聽,兩个人有講有笑,期待全家做伙食暗頓的時陣。

  「哇!阿母,今仔日的菜足豐沛,你若像魔術師喔,連鞭仔的時間,你就變出滿滿一桌的菜,真正足厲害的!」小弟目睭展大大蕊講。阿母應講:「是啊!毋過我提的毋是魔拐(kui),是煎匙;我嘛無番幔,干焦一領圍軀裙,我較成有神力的火烌姑娘啦!」聽著阿母的回答,規家伙仔笑甲東倒西歪,下班轉來的阿爸嘛喙笑目笑,伊講:「咱兜的火烌姑娘煮的菜真正有魔力,囡仔食了會變懸;大人食了有精神;老大人食了活甲百二歲,閣較奇怪的是,全家食了攏會笑咍咍喔!」阿爸講的話真有道理,我嘛和伊有仝款的想法,阮阿母煮的飯菜真正是全世界上好食的,食暗頓的時陣就是阮上快樂的時陣。你敢想欲知影阮阿母今仔日煮啥物好料的?講予你聽看覓。

  頭一項菜是「冷伴瓜仔哖」,這項菜是熱天飯桌頂定定看會著的。阿母驚熱人囡仔胃口bái,所以會共瓜仔哖礤(tshuah)絲濫酸酸甜甜的醬料,囥入冰箱,食的時冰冰涼涼,阮小弟袂佮意食青菜,毋過冰過的瓜仔哖竟然有法度入去伊的胃,你就知影這項菜的威力了honnh。第二項菜是雜菜滷,內面有海帶、豆乾、雞跤和滷肉,芳貢貢的料和滷汁濫佇白飯,就算食十碗嘛無問題,咧做兵的阿舅若來阮兜食飯,這鍋攏會先見底,講到遮我的喙瀾嘛強欲流出來矣。阮兜的飯桌嘛是「國際化」的,有時有日本式的「壽司」,有時陣是泰式的糋潤餅,今仔日是美式的番麥湯。內底有番麥佮紅菜頭,khà一粒卵閣濫起司和牛奶,保證一碗了閣想欲第二碗,遮的攏是阮兜飯桌上的美味料理,攏是「五星級」的喔!

  食暗頓的時陣嘛是一工內底上輕鬆的時陣。有時,阿爸會拍開電視,予阮那食飯那看bàng-gah;有時,會放收音機,予阮一面聽音樂,當然「食飯配話」佇阮兜是被允准的,我會共學校發生的代誌講予爸媽聽,小弟會大喙大喙的一直食,干焦阿母問伊的時才會應,伊食飯的時定定飯粒仔落甲規桌頂,阿母會共伊講「一粒米,百粒汗」的道理,希望伊珍惜物件,無通討債。有一擺,我和上好的同學冤家,食暗頓的時,我頭ànn-ànn一句話都無講,阿爸掠準我破病矣,阿母隨問我是毋是佇學校發生啥物代誌?話一講煞,我的目屎就一滴一滴滴落碗內,我感覺彼工的飯足鹹,菜足苦,心情真bái。食暗頓的時陣是阮全家開講,拍開心窗的時陣。

  我上佮意食暗頓的時陣,會當食著阮阿母煮的好料理:會當和阮阿爸做伙聽音樂;和小弟做伙看bàng-gah,閣會當和阿母談天說地,所以,我上佮意食暗頓的時陣。

 

真平台語編輯群

大觀園:詩歌精選:現代詩 

曆 日  陳正雄

一相遇

就注定

咱的未來無久長

 

每一擺

看你一面

你就消 sán一分

每一日

見你一回

你就年老一點...

«繼續閱讀»

大觀園:詩歌精選:現代詩 

        林沈默

有一種戀,

毋管生老病死,

對一支小雨傘,

追來到一隻輪椅。

 

有一款情,

毋驚山崩地裂,

對一○一大樓,

牽去到盤古開天。

 

愛花,毋是貪花開。...

«繼續閱讀»

大觀園:詩歌精選:現代詩 

三行詩:詐/計/生   胡民祥

歐洲原人消失三萬年

輸弱弱現代人先祖

心胸通光袂曉詐...

«繼續閱讀»

大觀園:詩歌精選:現代詩 

水牛厝出世記   林央敏

我出世的水牛厝庄,

徛佇嘉南平原中央。

被懸山框起的牛稠溪,

位日出的所在趖出來,

趖到平洋的胸坎頂,

跤步放慢嘛毋暫停,...

«繼續閱讀»

大觀園:演講稿 

一粒米百粒汗   莊蕙菁

    各位評判老師,在座同齊做伙來比賽的囡仔兄、囡仔姊,逐家好!今仔我所欲演講的主題是「一粒米,百粒汗」。(重複一次)

    阮阿公定定共我講:社會上每一項代誌,攏是逐家互相相kīng,逐家互相相牽成,逐家付出腦智、勞力和(hâm)血汗,才有成果出來的;無可能干焦靠一个人爾(nīa)爾,就有法度騰雲駕霧、飛天鑽地。陳綢(tiû)老阿媽的愛心故事予人知影了後...

«繼續閱讀»

大觀園:演講稿 

我的心事啥人知  林美麗

各位評判先生,以及在座的同伴逐家好,我是×號,今仔日我所欲演講的題目是:我的心事啥人知。

(唱)「心事若無講出來,有啥人會知,有時陣想欲訴出,滿腹的悲哀。」見若聽著阿公咧唱這條歌,我就會綴伊唱,唱煞閣會加一聲「哎!」,阿公就會唸講:「囡仔人吐啥物大氣,吐大氣會 bē 大漢。」謼!阿公,我已經十七歲矣,毋是囡仔人,而且我是因為 bē 大漢才吐大氣,毋是因為吐大氣才 bē 大漢。...

«繼續閱讀»

頁數:  59 60 61 62 63 64 65 66 67 68
意見反應信箱:service@king-an.com.tw
Copyright © 2012 真平企業有限公司 版權所有.禁止擅自轉貼