大觀園:演講稿 

一擺練習的機會

田美瑜

        我是客人,佇學校學的是客語,不而過,佇四年仔的時陣,我的客語課是佇咧中晝逐家歇睏的時陣,嘛是因為按呢,我才有機會佮同學做伙學臺語。

  捌聽過大人咧講:毋捌食過豬肉,嘛看過豬行路。因為厝邊隔壁in開講攏是講臺語,所以我感覺臺語真心適,嘛袂感覺生疏。上臺語課無偌久,有一工,臺語老師講,學校會舉辦一个臺語朗讀的比賽,叫幾个同學佇咧中晝來教室練習朗讀的文章。原來臺語有誠濟學問,嘛有真濟鋩角,毋是遐爾簡單就會使了解的。毋但有臺語的字,閣有臺羅音標,朗讀的時陣閣愛注意合脣音佮入聲,我親像鼓井的水雞,這馬才知影臺語有偌爾濟的學問佇遐,毋是干焦口語的溝通爾。

  比賽彼一工,看著選手攏有兩步七仔,真厲害。我真驚惶,就開始緊張矣!竟然家己聽著心臟的聲,上尾我想我就已經咧比賽就愛閣認真一下。我就共老師教的合脣音佮入聲,攏誠認真練習幾若擺。換我念的時陣,本底阮有淡薄仔緊張,不而過,我想講頭毛搵澹(tâm),無洗袂當。就穩心仔大聲唸出來,閣共我家己的感情放落去,這步真讚呢。就按呢,我煞袂記得,有二十幾雙目睭咧看,我就袂緊張矣!

  過了真濟工,老師講,教務處已經公佈臺語朗讀比賽的選手矣,閣恭喜我得著頭名,我親像得著獎券仝款,歡喜甲跳起來。轉厝裡隨共阿母講這个好消息。阿母聽著嘛喙仔裂獅獅,閣共我講,貓也會足百(peh)樹喔。我的阿母閣歡頭喜面共厝邊頭尾講這个好消習,厝邊攏呵咾我真巧,真厲害。

對(uì)這改的練習機會,予我得著幾點真重要的感想:

第一:驚驚袂著等,假使干焦佇遐驚東驚西,烏白想,無去練習,成功一定毋是咱的。

第二:想欲成功無啥物鋩角佮撇步,就是愛認真學,練習閣練習。

第三:家己栽一欉較贏看別人,欣羨別人的成功,不如家己綿死綿爛拍拚來練習,若是看別人著頭名,才來後悔就袂赴市矣。

 

海翁台語文學月刊第181期

大觀園:生活用語 

驚蟄(新曆3月初5/初6)

簡介:掌管這个節氣的神是雷公,雷公會霆雷,共睏冬的蟲叫精神,所有佇寒人覕起來的蟲攏會出來活動。作穡人愛開始拍拚巡田水、掠害蟲。這陣嘛是杜鵑的花季。

俗語:驚蟄,鳥仔曝翼。寒人的時覕起來的鳥仔,佇這个時陣飛出來曝日。

人文活動:舊曆2月初2是土地公生,有「做頭牙」的風俗,開公司、做生理的頭家會準備豐沛的祭品來為土地公慶祝,嘛會請員工「食春酒」,希望員工會當繼續為公司拍拚。

當令食材:韭菜。桃園大溪的韭菜規年迵天攏有生產,毋過春天的韭菜上芳、上好食。

      煙仔魚(鰹魚)。逐年3~6月,佇花蓮沿海會當掠著真濟煙仔魚。

大觀園:風土民情 

女兒節

3月初3是日本的女兒節,閣叫做人偶節、雛祭。

女兒節佇日本是誠受重視的節日,佇這工爸母會準備像坎仔的展示台來囥一款穿日本衫,叫做「雛人形」的日本尪仔。一般來講,這款囥尪仔的坎仔會有七坎,尪仔囥的順序佮內容嘛真講究,其中除了日本尪仔,閣有足濟的小配件。

假使女兒節的尪仔保存了誠好,大部份會代代相傳,有一寡家庭甚至有超過幾若百个,看起來足壯觀。

毋過雖然講女兒節的尪仔排起來誠了時間,毋過只要3月初3一過,女兒節的尪仔連鞭就愛收起來,因為古早人相信這會影響查某囡仔大漢以後的婚期。

 

除了女兒節的尪仔以外,女兒節閣有誠濟應景的物件,譬如會佮尪仔囥做伙的菱餅、雛霰佮白酒,另外嘛會用蚶仔表示女性對愛情的專一,送禮方面,大多數會揀佮桃花相關的物件,親像和菓子等等。

大觀園:風土民情 

愛國婦人館佮湯德章

佇臺南市孔子廟的邊仔,有一間誠有古早味的兩層樓仔,頭前掛一塊牌仔「愛國婦人館」。

愛國婦人館佮湯德章有啥物關係?
這間建築佇日本時代是日本愛國婦人會的根據地,二戰結束了後,成做臺南市南區區公所的辦公室,湯德章律師是第一任的區長,毋過佇伊上任了後無偌久,228事件爆發,各地的抗議行動湠到臺南,湯德章律師因為228事件,成做臺南唯一公開銃決的人。
228事件到今已經70年,湯德章律師嘛過身70年矣。自2月25到3月11,愛國婦人館有湯德章的特展,有閒會當來遮,了解彼个時代的故事。

大觀園:詩歌精選:現代詩 

儂影伴孤燈――詩寫花蓮張七郎夫人                     黃勁連

花蓮的暗暝,更深
夜靜,古井邊
的蟲聲叫無停
梧桐葉一葉一葉
輕輕落在古井前

伊的心親像海湧
伊的心猶原撦跋摒
若想起四十二冬前
二二八的不幸
伊的目屎流袂停
安定的生活
幸福的家庭
雄雄大海起風湧

二二八,怹翁
佮後生被掠被殺
死駕不白不明
怹翁佮囝是醫生
救人數萬千
四月初的一工
予警察掠去扑兼刑
予人掠去銃殺佇大圳前
血啊一滴一滴
一滴一滴流無停
肝腸寸斷的情景
啥儂同情,伊的目屎
親像塊落雨,一直流
一直流、流無停
直正是一場惡夢
二二八破壞善良的家庭
二二八毀滅伊的前程

天公伯也汝無疼
疼咱台灣的眾生
一重閣一重,一重
閣一重,四百冬的歷史
一直重演島嶼的不幸
這是甚麼世界
這是甚麼儂種
怹翁怹囝是古意儂
是救儂的醫生
亦無經過審問亦無判刑
就掠去銃殺佇大圳前

翁佮後生被剉被殺
叫伊如何走揣前程
伊的目屎流袂停
伊的心猶原撦跋摒
四十冬後的現在
星光月光轉無停
伊的目珠已經失明

只聽着梧桐葉
一葉一葉落在窗前
一葉一葉怨嘆伊的飄零
只聽見蟲聲吱吱叫
親像毋甘伊的不幸
替伊一聲、一聲哮不明

只有伊消瘦的形影
伴着暗淡的孤燈

 

收錄於《黃勁連四十年詩選 走揣文學ê台灣》

大觀園:臆謎猜 

[臆謎猜_3]

題目:九橫六直,孔子公臆三日。

{臆一字}

 

*

 

答案:晶

大觀園:臆謎猜 

[臆謎猜_2]

題目:細漢生角,大漢無角,大甲二五、六,又閣再發角。

{臆一種自然現象}


*


答案:月娘

大觀園:臆謎猜 

[臆謎猜_1]

題目:黃色布,包銀條,身軀彎彎雙頭翹。

{臆一種果子}


*


答案:弓

大觀園:風土民情 

臆謎猜

臆謎猜是將謎猜寫佇鼓仔燈頂面,予人臆的風俗,若是有人臆著就會奏樂,閣會贈送獎品。

謎猜本身是一款影射文字佮事物的娛樂。

佇台灣,這款風俗頭仔是對清朝起先,了後到了日治時期,各地區的文人為著欲傳承文化,開始推廣謎猜,甚至報紙也會佇節日的時陣刊登祝賀。

大觀園:風土民情 

軁燈跤生膦脬 

佇元宵節,民眾會去註生娘娘的廟仔裡去進香,因為「燈」佮「丁」唸起來仝音,所以聽講查某人若是軁過鼓仔燈下底,除了會當祈求當年有好運以外,閣會當保庇生添丁!

「軁燈跤生膦脬」的意思,就是過鼓仔燈下底,明年生後生。

頁數:  3 4 5 6 7 8 9 10 11 12
意見反應信箱:service@king-an.com.tw
Copyright © 2012 真平企業有限公司 版權所有.禁止擅自轉貼