大觀園:風土民情 

菜園偷俗

菜園偷俗是古早元宵節的風俗,利用元宵節製造予未婚男女結緣的機會。

台灣嘛有類似的俗語,「偷挽蔥,嫁好翁;偷挽菜,嫁好婿」,表示未婚女子佇元宵節偷挽蔥、菜會當求著好姻緣,猶毋過挽著的蔥、菜愛當場放棄,袂使紮轉去。

啊若未婚男子,是流行「跳菜股娶好某」按呢的風俗。

大觀園:風土民情 

元宵節

舊曆的正月十五是元宵節,閣叫做元宵暝、上元暝、燈節、小過年。

佮別位的華人地區無仝,台灣的元宵節會舉辦大型的元宵燈會,這項風俗聽講是對早前台灣的「迎鼓仔燈」演變來的,迎鼓仔燈就是佇當地的大廟前所舉辦的燈會。

除了燈會以外,元宵節猶閣有幾若款活動,親像食元宵、臆謎猜、菜園偷俗、鑽鼓仔燈等等……非常鬧熱!

大觀園:影片 

[元宵影片_風俗]

大觀園:影片 

[元宵影片_兒歌]

大觀園:風土民情 

雞年犯太歲

「犯太歲」是一款華人特有的民間風俗,是咧指命局犯著當年值星的「太歲」,太歲是眾年神內底上威嚴的,所以百姓攏愛避免得罪伊。

今年丁酉年是雞的本年,照風俗佮相雞的人需要「安太歲」,按呢今年才會使有閣較好的運勢。

除了雞以外,今年相兔的人因為佮太歲正沖,所以嘛需要安太歲,才袂拄著無好的變動。

大觀園:俗諺 

食果子拜樹頭;食米飯拜田頭

音讀:Tsiah8 kué-tsí pài tshiū-thâu; tsiah8 bí-png7 pài tshân-thâu. 

釋義:指人要懂得感恩,飲水思源,不可忘本。



大觀園:風土民情 

守歲

「守年」是民間「二九暝」的風俗。

守年這個習俗是因為過去,百姓會佇二九暝的暗暝點蠟條抑是油燈,規暝無睏,等待天光,希望用燈火趕走瘟疫病苦,迎接來年光明的含意,嘛有傳說講是年輕人為厝內的老人守歲,會當幫老人添歲壽。

大觀園:俗諺 

[雞的諺語-4] 做雞著筅,做人著反

內容介紹:
      雞若欲討食,就愛用跤爪筅物件來食;人若欲生存,嘛愛想盡辦法。
      橫直「千辛萬苦,為著腹肚。」逐家為著趁食,只好逐日捙跋反(tshia-puah8-píng)。

相近華語:喻不勞動就沒有飯吃。

像講:
      雞欲討食、人欲生存攏愛骨力拍拚,因為「做雞著筅,做人著反」、「做牛著拖,做人著磨」,只要逐家認真來拍拚一定枵袂死。
      現此時景氣䆀,嘛有人了解著「油湯趁、油湯食,毋趁做乞食」的道理,排路邊擔仔來維持生活。雖然利純較少,毋過in骨力做,「錢大把人就落肉,錢小把捷趁成塔。」規家伙仔就有通食穿,毋免去做乞食。

 

大觀園:俗諺 

[雞的諺語-3] 押雞毋成孵

內容介紹:
      雞母孵卵的時陣若到,免人講伊就會家己去。猶毋過伊若無想欲孵卵,就算強押雞母去坐佇卵的頂頭,伊毋孵就是毋孵,你嘛無法度伊。
      這句俗語就是教咱做代誌的時陣,一定愛尊重對方的想法,毋通家己講家己著,勉強對方來接受。

相近華語:謂強迫無效,要因勢利導。


像講:
      咱做家長、先生的人,若是拄著囡仔無愛讀冊,就愛佮伊好好參詳,揣出原因是啥貨,沓沓仔來解決,毋通一直逼伊,甚至閣放聲欲共伊恐嚇。
      臺灣俗語講:「押雞毋成孵」、「啉,啉人歡喜酒;趁,趁人甘願錢」,「歡喜甘願」是教囡仔讀冊上重要的原則。這馬嘛誠時行講:「興趣是上好的老師」,伊若毋情毋願,你較做嘛是做戇工。

 

大觀園:俗諺 

[雞的諺語_2] 大隻雞慢啼

內容介紹:
       大隻雞,嘛有人講「大格雞」,因為品種無仝,發育期較長,毋才會比普通雞仔較慢學會曉啼更(thî-kenn)。
      不而過就是因為經過較濟時間的準備,若開始啼的時,就有法度比普通雞仔閣較大聲、傳閣較遠。

相近華語:大器晚成。

像講:
      每一个人的發育有緊有慢,佇學校的學習嘛是相仝。
      人講:「輸人毋輸陣,輸陣歹看面。」有的學生囡仔若是綴人袂著,家長攏會足緊張。這个時陣,阮做老師的人,攏會用「大隻雞慢啼」來安搭(an-tah)序大人,因為咱對序細的成就,愛永遠期待、耐心等待才應該。

 

 
頁數:  4 5 6 7 8 9 10 11 12 13
意見反應信箱:service@king-an.com.tw
Copyright © 2012 真平企業有限公司 版權所有.禁止擅自轉貼