網站:母語交流道 

台語繪本教學分享01

分享教師:黃靜惠

大觀園:生活用語 

驚蟄(新曆3月初5/初6)

簡介:掌管這个節氣的神是雷公,雷公會霆雷,共睏冬的蟲叫精神,所有佇寒人覕起來的蟲攏會出來活動。作穡人愛開始拍拚巡田水、掠害蟲。這陣嘛是杜鵑的花季。

俗語:驚蟄,鳥仔曝翼。寒人的時覕起來的鳥仔,佇這个時陣飛出來曝日。

人文活動:舊曆2月初2是土地公生,有「做頭牙」的風俗,開公司、做生理的頭家會準備豐沛的祭品來為土地公慶祝,嘛會請員工「食春酒」,希望員工會當繼續為公司拍拚。

當令食材:韭菜。桃園大溪的韭菜規年迵天攏有生產,毋過春天的韭菜上芳、上好食。

      煙仔魚(鰹魚)。逐年3~6月,佇花蓮沿海會當掠著真濟煙仔魚。

網站:母語交流道 

強烈大陸冷氣團

天氣才拄燒烙,北臺灣的氣溫欲閣降落來,彼是因為「強烈大陸冷氣團」南下所造成的影響。

「強烈大陸冷氣團」佮「大陸冷氣團」的分別,是氣溫會降到12度以下,這擺南下的冷氣團性質較焦,時間較短,所以較袂像頂一擺寒流遐爾冷,毋過嘛是愛注意早暗的溫度變化。

大觀園:風土民情 

女兒節

3月初3是日本的女兒節,閣叫做人偶節、雛祭。

女兒節佇日本是誠受重視的節日,佇這工爸母會準備像坎仔的展示台來囥一款穿日本衫,叫做「雛人形」的日本尪仔。一般來講,這款囥尪仔的坎仔會有七坎,尪仔囥的順序佮內容嘛真講究,其中除了日本尪仔,閣有足濟的小配件。

假使女兒節的尪仔保存了誠好,大部份會代代相傳,有一寡家庭甚至有超過幾若百个,看起來足壯觀。

毋過雖然講女兒節的尪仔排起來誠了時間,毋過只要3月初3一過,女兒節的尪仔連鞭就愛收起來,因為古早人相信這會影響查某囡仔大漢以後的婚期。

 

除了女兒節的尪仔以外,女兒節閣有誠濟應景的物件,譬如會佮尪仔囥做伙的菱餅、雛霰佮白酒,另外嘛會用蚶仔表示女性對愛情的專一,送禮方面,大多數會揀佮桃花相關的物件,親像和菓子等等。

網站:母語交流道 

米潘的妙用

咱若咧洗米,米潘千萬毋通共倒掉,會當好好仔利用遮的水喔!

 

1.

米潘有一種叫做「生物鹼」的成份,用來洗碗抑是拭門窗真好用!

嘛會當用來拭拄油漆過的物件,會當消除激鼻的油漆味。

 

2.

菜刀刣過魚肉牛肉這種味較重的肉了後,用米潘浸一下,就會當消除臭臊味。

假使菜刀生鉎,會當用較厚的米潘浸一段時間,按呢鐵鉎就較簡單鑢掉。

 

3.

米潘內底的澱粉佮維生素,會當消除面的油垢,長期用米潘來洗面洗手,皮膚會變甲較金滑。

米潘內底的養份,用來沃花嘛有落肥的效果,花會開甲較光豔。

網站:母語交流道 

省水妙招__再利用

生活中,有真濟糞埽攏會當做廢物利用,水當然嘛會使。

恁兜若有使用除溼機抑是濾水器,遮的機器所產生的廢水,會使用來洗車,嘛會使用來攎塗跤喔!

網站:母語交流道 

省水妙招__減少浪費

省水上重要的一步,就是愛避免水佇無需要的時陣無細膩浪費掉,今仔日來教逐家兩个檢查的方法。

 

1.馬桶水箱的檢查

馬桶水箱若是漏水是誠歹發覺,會當揀無人使用的時陣,倒一寡食用色素入去水箱,等二十分鐘左右,若是馬桶內底出現色水,就代表水箱咧漏水矣,愛倩人來修理。

 

2.沃水揀時機

厝內若有種花草,早暗攏愛沃水,毋過沃水嘛愛揀時機,避開日頭猛的時陣,會當減少水份予日頭爆焦的機會,按呢就會當避免無必要的浪費矣。

網站:母語交流道 

限水危機

最近新聞定定會當看著「限水」的代誌。

今年自春天以來,因為雨的量無夠,全台各地方的水庫攏開始出現危機警報,政府單位甚至已經做好用人工的方法來製造雨水的準備,來減輕欠水的壓力。

目前就算雨量無夠,閣有來自河川的水會當維持水量,若是擋到三月底閣毋落雨,恐驚就會面臨限水的危機。

所以,咱逐家應該愛採取行動,自明仔載開始,咱就來進行「省水撇步」的單元!

網站:母語交流道 

貓之日

2月22,是日本誠出名的「貓の日」,因為2的日語發音是「nya」,聽起來足成是貓仔的叫聲,就按呢自1987年開始,日本一佮動物委員會就將2月22訂做「貓の日」。

恁兜敢有人飼貓,歡迎佮阮分享貓仔的相片喔!

網站:母語交流道 

世界母語日

2月21是世界母語日,咱來講一个故事。

世界母語日的發明愛追溯到西元1947年,彼時巴基斯坦拄成做獨立的國家,巴基斯坦的國土會當分做東巴基斯坦佮西巴基斯坦,巴基斯坦政府決定將西巴斯坦所使用的「烏爾都語」當做巴基斯坦唯一的官方語言,按呢的決定予東巴基斯坦袂爽,因為東巴基斯坦的地理、文化以及語言佮西巴基斯坦攏無仝款,使用的語言是「孟加拉語」。

所以東巴基斯坦開始相連紲發起抗議行動,真濟學者佮學生攏參與行動,佇1952年2月21日的抗議行動,有真濟人予警方掠走,閣有人犧牲,煞尾巴基斯坦的政府只好同意「孟加拉語」的合法性。

因為這是「人類有史以來為著語言來犧牲」的事件,國際社會就決定共2月21這工定做「世界母語日」,希望各位會當寶惜家己的母語,尊重語言的多元性。

頁數:  1 2 3 4 5 6 7 8 9 10
意見反應信箱:service@king-an.com.tw
Copyright © 2012 真平企業有限公司 版權所有.禁止擅自轉貼